నాసిక్‌లో గోదావరి భారీ వరద: ప్రసిద్ధ దూత్ మారుతి విగ్రహం నీట మునిగింది

మహారాష్ట్రలోని నాసిక్ జిల్లాలో ఎడతెరిపి లేని భారీ వర్షాల కారణంగా గోదావరి నది ప్రమాదకర స్థాయిలో ప్రవహిస్తోంది. గంగాపూర్ డ్యామ్ 98% నిండడంతో అధికారులు వేల క్యూసెక్కుల నీటిని నదిలోకి విడుదల చేస్తున్నారు. ధార్ణ, దేవు నది ప్రాజెక్టుల నుండి కూడా భారీగా నీరు విడుదలవుతోంది.

ప్రసిద్ధ పుణ్యక్షేత్రమైన రామకుండ్ గోదా ఘాట్ సమీపంలోని చిన్న ఆలయాలు పూర్తిగా నీట మునిగాయి. అక్కడి దూత్ మారుతి విగ్రహం కూడా మునిగిపోయింది. వందలాది ఎకరాల్లో పంటలు నాశనమయ్యాయి. పలుచోట్ల పాత భవనాలు కూలిపోయాయి, 51కి పైగా పెద్ద చెట్లు నేలకూలాయి. వరద నీరు రహదారులపై చేరడంతో 27 రహదారులపై రాకపోకలు నిలిపివేశారు. నిఫాడ్ తాలూకాలో వంతెనలు మునగడంతో చుట్టుపక్కల గ్రామాలకు బయటి ప్రపంచంతో సంబంధాలు తెగిపోయాయి.

సుర్గానా తాలూకాలో వరద నీట ప్రవాహంలో చిక్కుకుని ఒకరు మృతి చెందారు. పలు పశువులు కొట్టుకుపోయాయి. జిల్లా యంత్రాంగం సహాయక బృందాలు రంగంలోకి దిగి, వరద ముంపు ప్రాంతాల్లో చిక్కుకున్న 200 మందికి పైగా ప్రజలను సురక్షిత ప్రాంతాలకు తరలించాయి. లోతట్టు ప్రాంతాల ప్రజలు అప్రమత్తంగా ఉండాలని, నది ప్రాంతాలకు వెళ్లవద్దని అధికారులు హెచ్చరికలు జారీ చేశారు. గోదావరి నది ప్రవాహం ప్రస్తుతం మహారాష్ట్రలోనే ప్రమాదకరంగా ఉన్నా, దిగువ ప్రాంతాలైన తెలుగు రాష్ట్రాలపై కూడా ప్రభావం చూపే అవకాశం ఉంది.