నాగార్జున సాగర్ కాలువలోకి గోదావరి జలాలు: ఖమ్మం రైతులకు సాగునీటి వెసులుబాటు

నాగార్జున సాగర్ నీటి లభ్యత లేని నేపథ్యంలో ఖమ్మం జిల్లాలోని సాగర్ ఆయకట్టు రైతులకు సీతారామ ఎత్తిపోతల ప్రాజెక్టు ద్వారా గోదావరి నీటిని సరఫరా చేస్తున్నారు. భద్రాచలం సమీపంలోని బీజీ కొత్తూరు వద్ద నుంచి 1500 క్యూసెక్కుల నీటిని పంపింగ్ చేస్తూ, రాజీవ్ లింక్ కెనాల్ ద్వారా నాగార్జున సాగర్ కాలువలోకి నీరు చేరుతోంది.

ఈ నీరు కాలువలో 14 కిలోమీటర్లు వెనక్కి ప్రయాణించి వైరా రిజర్వాయర్‌కు చేరుతోంది. వైరా రిజర్వాయర్‌లో నీటి మట్టం రెండు అడుగులు పెరిగింది. అక్కడి నుంచి వైరా, సత్తుపల్లి, కల్లూరు మండలాల్లోని సుమారు లక్షా 20 వేల ఎకరాల ఆయకట్టుకు సాగునీరు అందుతోంది.

ఈ ఏడాది వర్షాభావం కారణంగా నాగార్జున సాగర్‌లో నీటి నిల్వ 510 అడుగుల వద్ద ఉండగా, కాలువలకు నీటి విడుదల లేదు. ఖమ్మం జిల్లాలో 2 లక్షల ఎకరాలకు పైగా సాగర్ ఆయకట్టు ఉన్నా, కృష్ణా జలాలు అందుబాటులో లేవు.

సీతారామ ప్రాజెక్టును గత బీఆర్ఎస్ ప్రభుత్వ హయాంలో గోదావరి నీటిని ఎత్తిపోసేందుకు రూపొందించారు. 13వేల కోట్ల అంచనాతో మొదలైన ఈ ప్రాజెక్టు వ్యయం 20 వేల కోట్లకు చేరింది. కాలువలు, పంప్ హౌస్‌ల నిర్మాణం జరిగినా అప్పట్లో నీటిని పంపింగ్ చేయలేదు.

ప్రస్తుత కాంగ్రెస్ ప్రభుత్వం రాష్ట్ర వ్యవసాయ శాఖ మంత్రి తుమ్మల నాగేశ్వరరావు చొరవతో రూ.100 కోట్లతో రాజీవ్ లింక్ కెనాల్ నిర్మించి, సీతారామ పంప్ హౌస్‌లను ప్రారంభించింది. ముఖ్యమంత్రి రేవంత్ రెడ్డి ఈ పంప్ హౌస్‌లకు విద్యుత్ సరఫరా చేయాలని ఆదేశించారు. 2024 ఆగస్టు 15న డిప్యూటీ సీఎం భట్టి విక్రమార్కతో కలిసి సీఎం ఈ పంప్ హౌస్‌లను ప్రారంభించారు.

వైరా ఎమ్మెల్యే రామదాస్ నాయక్ మాట్లాడుతూ, 'గోదావరి నీళ్లు తమ రిజర్వాయర్‌కు రావడం రైతులకు ఎంతో ఉపయోగకరంగా ఉంది. వర్షాలు లేని సమయంలో నారుమడి నాట్లకు నీరు లభిస్తోంది' అని చెప్పారు.

ప్రస్తుతం గోదావరిలో నీటి మట్టం 8 అడుగులకు పడిపోవడంతో ఎప్పుడైనా పంపింగ్ ఆపే అవకాశం ఉంది. గోదావరి పరీవాహక ప్రాంతంలో వర్షాలు పడితే మళ్లీ నీటి మట్టం పెరిగి పంపింగ్ కొనసాగుతుందని అధికారులు చెబుతున్నారు. ఈ ప్రయోగం సక్సెస్ అయితే ఖమ్మం, భద్రాద్రి, మహబూబాబాద్ జిల్లాల్లోని 10 లక్షల ఎకరాల ఆయకట్టుకు భవిష్యత్తులో గోదావరి నీరు అందే అవకాశం ఉందని వారు తెలిపారు.