ఖమ్మంలో ₹300 కోట్ల ఆయిల్ పామ్ యూనిట్‌కు గోదరేజ్‌తో సీఎం రేవంత్ రెడ్డి భేటీ

గోదరేజ్ ఇండస్ట్రీస్ ప్రతినిధి బృందం తెలంగాణ ముఖ్యమంత్రి రేవంత్ రెడ్డిని కలిసింది. ఖమ్మం జిల్లాలో ₹300 కోట్ల పెట్టుబడితో ఆయిల్ పామ్ ఇంటిగ్రేటెడ్ కాంప్లెక్స్ ఏర్పాటుపై చర్చించింది. ప్రభుత్వం ఇప్పటికే ఈ ప్రాజెక్టు కోసం 113.55 ఎకరాల భూమిని కేటాయించింది.

కంపెనీ ప్రతినిధులు అంతర్జాతీయ ప్రమాణాల సీడ్ గార్డెన్ కోసం అదనంగా 35-40 ఎకరాల భూమి కావాలని, ప్రాసెసింగ్ మిల్లుకు వెళ్లే ప్రధాన రహదారిని విస్తరించాలని విజ్ఞప్తి చేశారు. ఈ ప్రాజెక్ట్ ద్వారా 700 మందికి పైగా స్థానిక యువతకు ఉపాధి లభిస్తుందని తెలిపారు. ఈ అంశాలపై సీఎం సానుకూలంగా స్పందించారు.

రోడ్డు విస్తరణ పనులు వెంటనే చేపట్టాలని సంబంధిత అధికారులను ఆదేశించారు. అదనపు భూమి విషయంలో ప్రభుత్వం సానుకూలంగా పరిశీలిస్తుందని హామీ ఇచ్చారు. సీఎం ఈ సందర్భంగా మాట్లాడుతూ, సంప్రదాయ పంటలకు ప్రత్యామ్నాయంగా ఆయిల్ పామ్ సాగును ప్రోత్సహించి రైతుల ఆదాయాన్ని రెట్టింపు చేయాలన్నదే ప్రభుత్వ లక్ష్యమని చెప్పారు. గోదరేజ్ సమీకృత కాంప్లెక్స్ వల్ల ఉమ్మడి ఖమ్మం జిల్లా, పరిసర ప్రాంత రైతులకు నాణ్యమైన విత్తనాలు, మార్కెటింగ్ సదుపాయం త్వరగా అందుబాటులోకి వస్తుందని ఆశాభావం వ్యక్తం చేశారు.