శృంగేరి జగద్గురువు లేపాక్షి వీరభద్ర స్వామి ఆలయ సందర్శన; ప్రత్యేక పూజలు

శృంగేరి శారదా పీఠాధిపతి జగద్గురు విధుశేఖర భారతీ స్వామి సత్యసాయి జిల్లాలోని ప్రసిద్ధ లేపాక్షి దుర్గా పాపనాశేశ్వర వీరభద్ర స్వామి ఆలయాన్ని సందర్శించారు. తన విజయయాత్రలో భాగంగా కర్నూలు నుంచి కర్ణాటకలోని గౌరీ బిదనూరు వెళ్తూ ఈ ఆలయానికి వచ్చారు.

ఆలయ చైర్మన్ పరిగి వేణుగోపాలరావు ఆధ్వర్యంలో అర్చకులు స్వామీజీకి పూర్ణకుంభ స్వాగతం పలికారు. ఆలయ అర్చకులు నరసింహ శర్మ ఆలయ విశేషాలను వివరించారు. స్వామి వారు ఆలయంలోని పురాతన కట్టడాలు, వేలాడే స్తంభం, ఏడు శిరస్సుల నాగేంద్రుడిని పరిశీలించారు.

అనంతరం జగద్గురువు దుర్గా వీరభద్రులకు స్వయంగా ప్రత్యేక పూజలు నిర్వహించి భక్తులను ఆశీర్వదించారు. ఈ కార్యక్రమంలో జిల్లా కలెక్టర్ శ్యాం ప్రసాద్ కూడా పాల్గొన్నారు. పెద్ద సంఖ్యలో భక్తులు హాజరై స్వామి వారి ఆశీర్వాదం పొందారు.

ఆలయ చైర్మన్ మాట్లాడుతూ, జగద్గురువుల రాక తమకు అదృష్టమని, లేపాక్షి ఆలయానికి యునెస్కో గుర్తింపు లభించేలా స్వామి వారు ఆశీర్వదించారని తెలిపారు. లేపాక్షి చారిత్రక, పురాణ ప్రాధాన్యత కలిగిన క్షేత్రమని, అగస్త్య మహర్షి శివుడిని ప్రతిష్టించిన ప్రదేశమని ఆయన వివరించారు.