చాబహార్ పోర్ట్‌పై అమెరికా దాడులు; విద్యుత్ సరఫరా నిలిచివేత

పశ్చిమాసియాలో ఉద్రిక్త పరిస్థితులు మరింత తీవ్రమయ్యాయి. అమెరికా ఇరాన్‌లోని చాబహార్ ఓడరేవుపై భారీగా దాడులు చేసింది. ఈ దాడుల కారణంగా రేవు నగరంలో విద్యుత్ సరఫరా నిలిచిపోయింది.

ఇరాన్ ప్రెస్ టీవీ సమాచారం ప్రకారం, అమెరికా వ్యూహాత్మక మౌలిక సదుపాయాలను లక్ష్యంగా చేసుకుంది. కలందారీ పోర్ట్ మారిటైమ్ ట్రాఫిక్ కంట్రోల్ టవర్ ధ్వంసమైనట్లు తెలిపింది. దాడి అనంతరం తక్షణ సహాయక బృందాలు రెస్క్యూ చర్యలు చేపట్టాయి.

అమెరికా వైపు నుంచి, హార్ముజ్ జలసంధిలో వాణిజ్య నౌకలపై దాడులకు ఉపయోగించే నిర్మాణాలు, పరికరాలనే తాము లక్ష్యంగా చేసుకున్నట్లు వివరించారు. ఇటీవల కుదిరిన అమెరికా-ఇరాన్ కాల్పుల విరమణ తర్వాత చాబహార్ పోర్ట్‌పై జరిగిన తొలి దాడి ఇది.

చాబహార్ ఓడరేవు వ్యూహాత్మకంగా కీలకం. ఇది హార్ముజ్ జలసంధికి బయట, గల్ఫ్ ఆఫ్ ఒమన్‌కు దగ్గరగా ఉంది. హిందూ మహాసముద్రం నుంచి ఇరాన్ సముద్ర వాణిజ్యానికి అవసరమైన డీప్ వాటర్ పోర్ట్ ఇక్కడ ఉంది. భారత్ ఈ రేవు అభివృద్ధిలో పెట్టుబడులు పెట్టింది. ఇక్కడి నుంచి ఆఫ్ఘనిస్తాన్, మధ్య ఆసియా దేశాలకు సరకు రవాణా చేయాలని భారత్ భావిస్తోంది.