తుని చిన్నారి జహ్నవి మిస్సింగ్ కేసు: 33 రోజుల తర్వాత మరోసారి కొండపై గాలింపు

తుని ప్రాంతంలో గత నెల రోజుల క్రితం జహ్నవి అనే చిన్నారి కనిపించకుండా పోయింది. 33 రోజులు గడిచిపోయినా ఆమె ఆచూకీ లభించలేదు. ఈ నేపథ్యంలో పోలీసులు మరోసారి కొండ ప్రాంతంలో గాలింపు చర్యలు చేపట్టాలని నిర్ణయించారు.

బుధవారం జిల్లా కలెక్టర్ హరేంద్ర ప్రసాద్ బాధిత కుటుంబాన్ని పరామర్శించారు. చిన్నారి కుటుంబానికి ధైర్యం చెప్పిన ఆయన, ప్రభుత్వం తరఫున ఆర్థిక సహాయం అందిస్తామని హామీ ఇచ్చారు. కొండ ప్రాంతం గురించి తెలిసిన స్థానికుల సహకారంతో మళ్లీ గాలింపు నిర్వహిస్తామని తెలిపారు.

గతంలోనే పోలీసులు, అటవీ శాఖ అధికారులు, శ్రీశైలం నుంచి వచ్చిన డ్రోన్ బృందం సుమారు వెయ్యి ఎకరాల కొండ ప్రాంతాన్ని జల్లెడి పట్టినా ఆధారాలు దొరకలేదు. కిడ్నాప్ కోణంలోనూ దర్యాప్తు కొనసాగుతోంది. డిఎస్పీ బాలగంగాధర తలక్ మాట్లాడుతూ, బాపట్ల, ఒంగోలు ప్రాంతాల్లోనూ సిబ్బందిని పంపించామని చెప్పారు.

చిన్నారి క్షేమంగా దొరకాలని కుటుంబ సభ్యులు, స్థానికులు ఎదురు చూస్తున్నారు. ఇప్పటివరకు ఎలాంటి ఆచూకీ లభించకపోవడంతో ఈ కేసు పోలీసులకు సవాల్‌గా మారింది.