ఫీజ్ రీయింబర్స్మెంట్ బకాయిలు: తెలంగాణ హైకోర్టులో విచారణ

తెలంగాణలోని పలు ఇంజనీరింగ్ కళాశాలలు ఫీజ్ రీయింబర్స్మెంట్ బకాయిల కోసం హైకోర్టులో పిటిషన్ వేశాయి. 2023 నుంచి ప్రభుత్వం చెల్లించాల్సిన ఫీజు ఇంకా చెల్లించలేదు. ఈ నేపథ్యంలో గురువారం నాడు కూడా విచారణ కొనసాగింది.

ప్రభుత్వం తరపు న్యాయవాది, గత విచారణలో విధించిన స్టేను ఎత్తేయాలని కోర్టును కోరారు. స్టే వల్ల కొత్త అడ్మిషన్లకు ఆటంకం కలుగుతుందని, ఈ ఏడాది కొత్తగా చేరే విద్యార్థులతోపాటు 2,3,4 సంవత్సరాల విద్యార్థుల ఫీజు చెల్లించడానికి సిద్ధంగా ఉన్నామని తెలిపారు. ఆగస్టు 15 లోపు దాదాపు ₹1,000 కోట్ల ఫీజు చెల్లిస్తామని హామీ ఇచ్చారు.

పిటిషనర్ల న్యాయవాదులు ఈ ప్రతిపాదనను వ్యతిరేకించారు. మొత్తం బకాయిలు దాదాపు ₹10,000 కోట్లు ఉన్నాయని, కేవలం ₹1,000 కోట్లతో సమస్య తీరదని వాదించారు. 2023 నాటి బకాయిలు పూర్తిగా వెంటనే చెల్లించాలని, మిగిలినవి తగిన గడువులోపు చెల్లించేలా ఆదేశించాలని కోరారు.

ప్రభుత్వం, కళాశాలల తరపు న్యాయవాదుల మధ్య వాద ప్రతివాదాలు జరిగాయి. ప్రైవేటు కళాశాలలు గత బకాయిలు చెల్లించాల్సిందేనని, లేదంటే విద్యార్థుల నుంచి ఫీజు వసూలు చేస్తామని తెలిపాయి. విచారణ ముగిసిన తర్వాత హైకోర్టు తుది నిర్ణయం తెలియనుంది.