బంగారం ధరలు భారంగా మారడంతో గోల్డ్ ఎక్స్ఛేంజ్ ట్రెండ్ పెరిగింది

బంగారం ధరలు అధికంగా ఉండడంతో వినియోగదారులు పాత ఆభరణాలను ఎక్స్ఛేంజ్ చేసుకుని కొత్త డిజైన్లు తయారు చేయించుకుంటున్నారు. ఈ రీసైక్లింగ్ విధానం గత ఏడాదితో పోలిస్తే 40 శాతం వృద్ధి చెందిందని జువెలరీ వ్యాపారులు తెలిపారు.

పాత బంగారాన్ని తీసుకొచ్చి కొత్త డిజైన్లుగా మార్చుకోవడమే కాకుండా, కొందరు ధరలు మరింత తగ్గుతాయనే అంచనాతో అమ్మేస్తున్నారు. వ్యాపారులు తక్కువ మేకింగ్ చార్జీలు, ఎక్స్ఛేంజ్ బోనస్లు, కొత్త డిజైన్లపై రాయితీలు వంటి ఆఫర్లతో కస్టమర్లను ఆకర్షిస్తున్నారు. ప్రధాని మోదీ గోల్డ్ రీసైక్లింగ్‌కు ప్రాధాన్యం ఇవ్వాలని సూచించిన తర్వాత ప్రజల్లో అవగాహన పెరిగిందని వ్యాపారులు చెబుతున్నారు.

మధ్యతరగతి కుటుంబాలు పెళ్లిళ్లు, శుభకార్యాల కోసం ఇంట్లో ఉన్న పాత నగలను వినియోగించుకుంటున్నాయి. తద్వారా అదనపు ఖర్చు తగ్గుతుందని కొనుగోలుదారులు పేర్కొంటున్నారు.

అయితే కొంతమంది వినియోగదారులు మెల్టింగ్, తరుగు చార్జీల పేరుతో బంగారం విలువ ఎక్కువగా తగ్గిస్తున్నారని ఫిర్యాదు చేస్తున్నారు. ఎక్స్ఛేంజ్ చేసే ముందు బిల్లులు, స్వచ్ఛత పరీక్షలను తప్పకుండా చూసుకోవాలని, వివిధ షాపుల ధరలు, నిబంధనలు తెలుసుకోవాలని నిపుణులు సూచిస్తున్నారు.