గోల్కొండ జగదాంబికకు బంగారు చీర, కవచం, పాదాలు; జూలై 16న బోనాల ప్రారంభం

హైదరాబాద్‌లో బోనాల జాతర జూలై 16న ప్రారంభం కానుంది. గోల్కొండ కోటలోని జగదాంబిక మహంకాళీ అమ్మవారికి తొలి బోనం సమర్పించడంతో ఉత్సవాలు మొదలవుతాయి. ఈ ఏడాది అమ్మవారికి బంగారు చీర, కవచం, పాదాలను సమర్పించనున్నారు.

ఈ బంగారు ఆభరణాలను గోల్కొండ మహంకాళీ ఆలయ పూజారి సురేష్ చారి కుటుంబం తయారు చేయించింది. గత సంవత్సరం బంగారు బోనం సమర్పించగా, ఈసారి సురేష్ చారి తన మొక్కు చెల్లింపుగా చీర, కవచం, పాదాలు సమర్పిస్తున్నట్లు తెలిపారు.

ఈ బంగారు చీర, కవచాలు జూలై 16న మధ్యాహ్నం 12 గంటలకు రిసాల బజార్ నుండి ఊరేగింపుగా గోల్కొండ కోటకు తీసుకెళ్తారు. అక్కడ అమ్మవారి దర్శనం కోసం నెల రోజుల పాటు ఉంచుతారు. ఆ తర్వాత 11 నెలలు ఆలయంలోనే ఉంటాయి.

ఈ ఆభరణాలు తయారు చేయడానికి మూడు నెలల సమయం పట్టింది. కార్వాన్‌లో వెంకటేశ్ చారి, లాల్ దర్వాజాలో శివన్న ఆధ్వర్యంలో వీటిని రూపొందించారు. అమ్మవారికి కాసుల పేరు, నల్ల పూసల తాడు కూడా కూకట్‌పల్లికి చెందిన నవీన్ చారి తయారు చేశారు.

ఈ సంవత్సరం బోనాల ఉత్సవాలు గత సంవత్సరం కంటే పెద్ద ఎత్తున జరగనున్నాయి. వివిధ జిల్లాల నుండి కళాకారులు, విజయవాడ, పురాణపూర్ నుండి బృందాలు పాల్గొంటారు. ప్రభుత్వం తరఫున ఏసీపీ, స్థానిక పోలీసు కమిటీ సహాయం అందిస్తున్నాయి.

పూజారి కుటుంబం ప్రతి సంవత్సరం తొమ్మిది దేవాలయాలకు బంగారు బోనం తీసుకెళ్తారు. ఉజ్జయిని మహంకాళి, సికింద్రాబాద్ మహాకాళి, లాల్ దర్వాజా మహాకాళి, కార్వార్ దర్బార్ మైసమ్మ లాంగర్ హౌస్ ఆలయాలతో సహా పలు దేవాలయాలకు బంగారు బోనం సమర్పిస్తారు.