బంగినపల్లి మామిడికి గూడపల్లి గ్రామం ప్రత్యేకత: రైతులు చెప్పిన వివరాలు

అంబేద్కర్ కోనసీమ జిల్లా మల్కీపురం మండలంలోని గూడపల్లి గ్రామం బంగినపల్లి మామిడి పండ్లకు ప్రత్యేకమైన గుర్తింపు తెచ్చుకుంది. ఇక్కడి మామిడిపండ్ల రుచి, నాణ్యత జిల్లాలోనే కాకుండా రాష్ట్రవ్యాప్తంగా ఆదరణ పొందాయి.

స్థానిక రైతులు చెప్పిన వివరాల ప్రకారం, ఈ మామిడి రుచికి కారణం నేల స్వభావం, సముద్ర సామీప్యతే. ఇసక నేల (ఇసుక నేల) ఉండటంతో పాటు సముద్రం కేవలం 4–5 కిలోమీటర్ల దూరంలో ఉండడం వల్ల నేలలో లవణాలు, ఖనిజాలు అధికంగా ఉండి, కాయకు విపరీతమైన తీపి వస్తుందని రైతు సుబ్బారావు తెలిపారు.

మామిడి పండ్లను పురుగుల బారిన పడకుండా రక్షించేందుకు రైతులు కాయలకు కవర్లు కట్టే పద్ధతిని మూడేళ్ల క్రితం నుంచి అనుసరిస్తున్నారు. ఈ విధానం వల్ల కాయ నాణ్యత మెరుగుపడి, వ్యాపారం లాభదాయకంగా మారింది. ప్రస్తుతం కేజీ మామిడి పండ్లను ₹100 చొప్పున విక్రయిస్తున్నామని సుబ్బారావు చెప్పారు.

గూడపల్లిలో బంగినపల్లితో పాటు సోనరేఖ, చెరుకు రసం, నీలం, తోతాపురి తదితర రకాలు లభిస్తాయి. బంగినపల్లి సీజన్ మాత్రం జూన్ నెలలో మొదలవుతుంది. గూడపల్లి మామిడి పండ్ల రుచి ప్రత్యేకతను గుర్తించిన రాజమండ్రి, అమలాపురం, పాలకొల్లు వంటి ప్రాంతాల నుంచి కూడా ప్రజలు ఇక్కడికి వచ్చి కొనుగోలు చేస్తుంటారు.