జ్ఞానేశ్వరి మిస్సింగ్ కేసు: నెల రోజులు గడిచినా ఆచూకీ లేదు, తల్లిదండ్రుల ఆవేదన

కాకినాడ జిల్లా తుని మండలం సిహెచ్ అగ్రహారంలో జూన్ 6న రెండేళ్ల జ్ఞానేశ్వరి అదృశ్యమైంది. ఉదయం 11:50 గంటలకు తండ్రి వెంట తోటలోకి వెళ్లిన చిన్నారి కనిపించకుండా పోయింది.

పోలీసులు, ఎన్డీఆర్ఎఫ్, జాగిలాలు, హనుమాన్ బృందాలు కలిసి పెద్ద ఎత్తున గాలింపు చర్యలు చేపట్టాయి. 50 ఎకరాల పామాయిల్ తోట, పక్కనే ఉన్న జీడిపిక్కల తోట, చుట్టుపక్కల ప్రాంతాలను థర్మల్ డ్రోన్లతో శోధించారు. బోర్లు, బావులు, చెరువులు కూడా పరిశీలించారు. ఏడు మొబైల్ టవర్ల పరిధిలో వందల ఫోన్ కాల్స్ విశ్లేషించారు. 38 సీసీ కెమెరాల ఫుటేజీని పరిశీలించినా ఆచూకీ దొరకలేదు. గ్రామంలోని 750 ఇళ్లలోనూ విచారణ జరిపినా ఫలితం లేదు.

చిన్నారితో పాటు వెళ్లిన పెంపుడు కుక్క జూన్ 10న తోటలో కనిపించింది. దానికి జీపీఎస్ ట్రాకర్ అమర్చి వదిలారు. 24 గంటల్లో 10.5 కి.మీ. తిరిగి వచ్చాక జూన్ 14న కుక్క మృతి చెందింది. పోస్ట్‌మార్టం నివేదికలో రేబిస్ వ్యాధితో చనిపోయినట్లు తెలిసింది. నమూనాలు విశాఖ ఫోరెన్సిక్ ల్యాబ్‌కు పంపారు.

పాప ఆచూకీ ఇచ్చిన వారికి లక్ష రూపాయల బహుమతి ప్రకటించారు. డిప్యూటీ సీఎం పవన్ కళ్యాణ్, హోం మంత్రి అనిత ఆదేశాలతో 200 మంది పోలీసులు గాలింపు కొనసాగిస్తున్నారు. తల్లిదండ్రులు గణేష్, భవాని తీవ్ర ఆవేదనతో, “మా బిడ్డను తిరిగి ఇచ్చేయండి, ఎవరికీ చెప్పం” అని విజ్ఞప్తి చేస్తున్నారు.

ఈ కేసుపై శ్రీకాంత్ అనే న్యాయవాది హైకోర్టులో పీఐఎల్ దాఖలు చేశారు. గాలింపు చర్యలపై నివేదిక ఇవ్వాలని కోర్టు ఆదేశించింది. నెల రోజుల తర్వాత కూడా చిన్నారి మిస్టరీ వీడలేదు.