చార్మినార్ వద్ద H FAST దాడి: కల్తీ ఆహారం తయారీ, 110 కిలోల ఫ్రైడ్ చికెన్ స్వాధీనం

హైదరాబాద్‌లోని చార్మినార్ ప్రాంతంలో H FAST అధికారులు, ఆహార భద్రతా అధికారులతో కలిసి దాడులు నిర్వహించారు. పంచమహల్లాలోని మెసర్స్ ఆల్ అక్బర్ ఫాస్ట్ ఫుడ్ అండ్ గోడౌన్‌పై ఈ దాడి జరిగింది.

ఆ యూనిట్‌లో పరిశుభ్రత పాటించడం లేదని, FSSAI లైసెన్స్ లేకుండా వ్యాపారం నడుపుతున్నట్లు అధికారులు గుర్తించారు. నిషేధిత కృత్రిమ రంగులు, పదే పదే వాడిన వంట నూనెలు వినియోగిస్తున్నట్లు తేలింది. గోడౌన్‌లో కీటకాల నివారణ చర్యలు, నీటి నాణ్యత సర్టిఫికేట్‌లు కూడా లేవు.

దాడిలో 110 కిలోల ఫ్రైడ్ చికెన్, టిన్నుల వంట నూనె, కృత్రిమ రంగులు స్వాధీనం చేసుకున్నారు. ఇద్దరు వ్యక్తులను అదుపులోకి తీసుకున్నారు.

H FAST నిర్వహిస్తున్న వరుస దాడుల్లో మరిన్ని విషయాలు బయటపడ్డాయి. కుల్లిపోయిన కోడిగుడ్లు, గడువు ముగిసిన ఫ్లేవర్లతో బిస్కెట్లు, ఐస్‌క్రీమ్స్ తయారీ కేసులు గుర్తించారు. సమోసాలు, షవర్మాలు, చికెన్ ఫ్రైల్లో ఆకర్షణీయంగా కనిపించేందుకు సింథటిక్ రంగులు కలుపుతున్నట్లు కూడా తేలింది.

కల్తీ ఆహారం, పాడైపోయిన నూనెలు ఫుడ్ పాయిజనింగ్, కడుపునొప్పి, కిడ్నీ సమస్యలకు కారణమవుతాయని వైద్యులు హెచ్చరిస్తున్నారు. పిల్లలు, వృద్ధులు మరింత ప్రమాదంలో ఉంటారని చెబుతున్నారు.

ఆహార పదార్థాలు కొనేటప్పుడు తయారీ తేదీ, గడువు తేదీ, FSSAI లైసెన్స్ వివరాలు చూసుకోవాలని అధికారులు సూచిస్తున్నారు. అనుమానం వస్తే టోల్ ఫ్రీ నంబర్ 8712661212 కు ఫిర్యాదు చేయాలని వారు కోరుతున్నారు.