హనుమకొండ ప్రజావాణిలో 283 అర్జీలు; రోడ్లు, ఇందిరమ్మ ఇళ్లపైనే ఎక్కువ ఫిర్యాదులు

హనుమకొండ జిల్లా కలెక్టరేట్లో సోమవారం ప్రజావాణి నిర్వహించారు. కలెక్టర్‌తో పాటు వివిధ శాఖల అధికారులు హాజరయ్యారు. ప్రజల నుంచి మొత్తం 283 అర్జీలు స్వీకరించారు. కొన్ని సమస్యలను అక్కడికక్కడే పరిష్కరించినట్లు అధికారులు తెలిపారు.

కలెక్టరేట్లో 135, డివిజన్ స్థాయిలో 22, 12 మండలాల్లో 126 అర్జీలు అందాయి. ఎక్కువగా రెవెన్యూ, రోడ్లు, ఇందిరమ్మ ఇళ్ల పథకానికి సంబంధించిన దరఖాస్తులు ఉన్నాయి.

చింతగట్టు గ్రామస్తులు బెల్ట్ షాపులపై ఫిర్యాదు చేశారు. ఉదయం 5 గంటల నుంచి అర్ధరాత్రి వరకు మద్యం విక్రయాలు జరుగుతున్నాయని, జాతీయ సెలవు దినాల్లో కారు డిక్కీల్లో మద్యం అమ్ముతున్నారని రంజిత్ కుమార్ వినతి పత్రం ఇచ్చారు.

అయోధ్యాపురానికి చెందిన సాయి సూరజ్ రోడ్డు నిర్మాణంపై ఫిర్యాదు చేశారు. తమ వీధిలో 10–15 ఏళ్లుగా రోడ్డు లేదని, వర్షం పడితే బురదగా మారుతోందని తెలిపారు. రైతు బీమా పథకం రెన్యూవల్‌కు సంబంధించి కూడా విజ్ఞప్తులు వచ్చాయి.

ప్రజావాణికి వస్తున్న ఫిర్యాదుల సంఖ్య తగ్గడం లేదని అధికారులు వెల్లడించారు.