వరంగల్ జిల్లాలో వనమహోత్సవం: 25 లక్షల మొక్కల లక్ష్యంలో 13 లక్షలు పూర్తయినట్టు డీఎఫ్ఓ నికిత వెల్లడి

వరంగల్ జిల్లా వనమహోత్సవం లక్ష్యంలో ఇప్పటివరకు 13 లక్షల మొక్కలు నాటినట్టు జిల్లా అటవీ అధికారి డీఎఫ్ఓ నికిత తెలిపారు. ఈ ఏడాది మొత్తం లక్ష్యం 25 లక్షల మొక్కలు.

ఆమె మాట్లాడుతూ, ఈ ఏడాది వర్షపాతం సాధారణం కంటే 40 శాతం తక్కువగా ఉందన్నారు. అందువల్ల నీటి వనరులు ఉన్న ప్రాంతాల్లోనే ఎక్కువగా మొక్కలు నాటుతున్నామని చెప్పారు. మిగిలిన లక్ష్యాన్ని నీరు అందుబాటులో ఉన్న సంస్థల పరిధిలో పూర్తి చేసే ప్రణాళిక ఉందన్నారు.

వనమహోత్సవం ప్రత్యేక డ్రైవ్‌లో భాగంగా మొక్కలు నాటడంతో పాటు ఎస్ఎంసీ నిర్మాణాలు, నేల తేమ సంరక్షణ, మినీ పిట్స్ వంటి పనులు చేపడుతున్నట్టు డీఎఫ్ఓ తెలిపారు. ఇందులో అన్ని శాఖలు సమానంగా పాల్గొంటున్నాయన్నారు.

అన్ని శాఖలకు లక్ష్యాలు కేటాయించామని, రెండేళ్ల ముందు నుంచే ప్రణాళిక రూపొందించామని ఆమె వివరించారు. ప్రజాప్రతినిధులు, విద్యార్థులు, రైతులు స్వచ్ఛందంగా ఈ కార్యక్రమంలో పాల్గొనడానికి ముందుకు వస్తున్నారని చెప్పారు.