హనుమకొండ: హాస్టల్ గోడ దూకి పారిపోయిన ముగ్గురు విద్యార్థులు

హనుమకొండ జిల్లా సాయంపేట గ్రామంలోని కస్తూరిబా హాస్టల్‌లో నిన్న రాత్రి 2.30 గంటల సమయంలో ముగ్గురు విద్యార్థులు హాస్టల్ గోడ దూకి బయటికి వెళ్లడం కలకలం రేగింది. సమాచారం అందుకున్న పోలీసులు గాలింపు చేపట్టి, హాస్టల్ సమీపంలోని పామల తోటల్లో విద్యార్థులను గుర్తించారు. వారిని హాస్టల్‌కు తీసుకువచ్చి తల్లిదండ్రులకు సమాచారం ఇచ్చారు.

హాస్టల్ నిర్వాహకులు తెలిపిన వివరాల ప్రకారం, విద్యార్థులు గత రోజు నుంచి ఏడుస్తూ ఇబ్బంది పడుతున్నారు. ఈ విషయాన్ని గుర్తించిన హాస్టల్ సిబ్బంది వారితో మాట్లాడి, కౌన్సెలింగ్ చేసి, తల్లిదండ్రులకు ఫోన్ చేశారు. హాస్టల్ నుండి వెళ్లవద్దని, తల్లిదండ్రులకు సమాచారం ఇస్తామని చెప్పారు. ఉపాధ్యాయులను అప్రమత్తం చేసినప్పటికీ, అర్ధరాత్రి విద్యార్థులు గోడ దూకి వెళ్లారు.

పోలీసులు విచారణ చేపట్టారు. విద్యార్థుల తల్లిదండ్రులు హాస్టల్‌కు చేరుకుని, తమ పిల్లలు హాస్టల్‌లో ఉండలేరని చెప్పి అడ్మిషన్ రద్దు చేయించుకున్నారు. ఈ ఘటనతో హాస్టల్ నిర్వహణపై ప్రశ్నలు తలెత్తుతున్నాయి.