పామాయిల్ సాగులో సిద్దిపేట రాష్ట్రానికి ఆదర్శంగా నిలిచింది: హరీష్ రావు

మాజీ మంత్రి హరీష్ రావు సిద్దిపేట జిల్లాలో ఆయిల్ పామ్ సాగు విజయవంతంగా కొనసాగుతోందని తెలిపారు. తొలి పంట కోత జరిగిన సందర్భంగా ఆయన రైతులతో కలిసి గెలలను కోశారు.

2021 జూన్ 5న నంగునూరులో రైతు ఎల్లారెడ్డి పొలంలో మొదటి మొక్క నాటారు. 2024 జూన్ 15న అక్కనేపల్లి గ్రామానికి చెందిన రైతు నాగేందర్ పొలంలో మొదటి గెల కోయడం జరిగింది. కాళేశ్వరం ప్రాజెక్టు వల్ల గాలిలో తేమ శాతం పెరిగి, ఈ ప్రాంతంలో ఆయిల్ పామ్ సాగు సాధ్యమైందని హరీష్ రావు వివరించారు.

రైతుల ఆదాయం గణనీయంగా పెరిగిందని చెప్పారు. మేడిపల్లి గ్రామానికి చెందిన మహేందర్ అనే రైతు 2 ఎకరాల్లో ఆయిల్ పామ్ సాగు చేసి నెలకు రూ. 50,000 సంపాదిస్తున్నారని తెలిపారు. పాపిరెడ్డి అనే రైతు 10 ఎకరాల్లో సాగు చేసి ఈ ఏడాది ఆరునెలల్లోనే బ్యాంకు ఖాతాలో రూ. 26 లక్షలు జమ అయ్యాయని వివరించారు.

సిద్దిపేటలో త్వరలోనే ప్రభుత్వ రంగంలో మొదటి ఆయిల్ పామ్ రిఫైనరీ ప్రారంభం కానుందని హరీష్ రావు చెప్పారు. ఇది రాష్ట్రంలోనే తొలి ప్రభుత్వ రంగ రిఫైనరీ అవుతుందని, 3-4 నెలల్లో పూర్తవుతుందని తెలిపారు.