జూరాల, శ్రీశైలం ప్రాజెక్టులకు వరద ప్రవాహం కొనసాగుతోంది

కృష్ణా నది పరీవాహక ప్రాంతంలో కురుస్తున్న భారీ వర్షాలతో జూరాల, శ్రీశైలం జలాశయాలకు వరద ప్రవాహం కొనసాగుతోంది.

జూరాల ప్రాజెక్ట్ వద్ద 1,76,000 క్యూసెక్కుల ఇన్‌ఫ్లో నమోదవుతుండగా, 1,73,469 క్యూసెక్కుల నీటిని దిగువకు విడుదల చేస్తున్నారు. ఈ మేరకు 29 గేట్లు ఎత్తారు. ప్రాజెక్ట్ పూర్తి స్థాయి నీటి మట్టం 318.516 మీటర్లు కాగా, ప్రస్తుతం 318.01 మీటర్లకు చేరింది. ఎగువ, దిగువ జూరాల జలవిద్యుత్ కేంద్రాల్లో 10 యూనిట్ల ద్వారా 395 మెగావాట్ల విద్యుత్ ఉత్పత్తి జరుగుతోంది.

శ్రీశైలం జలాశయానికి 1,51,366 క్యూసెక్కుల ఇన్‌ఫ్లో వస్తుండగా, అవుట్‌ఫ్లో లేదు. ప్రాజెక్ట్ నిల్వ సామర్థ్యం 215 టీఎంసీలు కాగా, ప్రస్తుతం 59 టీఎంసీల నీరు ఉంది. ఎడమ గట్టు జలవిద్యుత్ కేంద్రాల్లో ఇంకా విద్యుత్ ఉత్పత్తి ప్రారంభం కాలేదు.

అధికారులు తెలిపిన వివరాల ప్రకారం, రాబోయే కొద్ది గంటల్లో ఇన్‌ఫ్లో మరింత పెరిగే అవకాశం ఉంది. వరద ప్రవాహం ఇదే స్థాయిలో మరో 20 రోజులు కొనసాగితే శ్రీశైలం పూర్తి సామర్థ్యానికి చేరుకుంటుందని ఇంజనీర్లు అంచనా వేస్తున్నారు.