తెలంగాణలో 5 రోజులు భారీ వర్షాలు – పలు జిల్లాలకు ఎల్లో అలర్ట్

వచ్చే 5 రోజులు తెలంగాణలో భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది. నైరుతి రుతుపవనాలు, ఉపరితల ద్రోణి ప్రభావంతో రాష్ట్రంలోని పలు జిల్లాల్లో వర్షాలు పడనున్నాయి.

భారీ వర్షాల ముందస్తు సూచనతో వాతావరణ శాఖ ఖమ్మం, కొత్తగూడెం, నల్గొండ, సూర్యాపేట జిల్లాలకు ఎల్లో అలర్ట్ జారీ చేసింది. అలాగే ఆదిలాబాద్, కుమారంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు జిల్లాల్లో ఉరుములు, మెరుపులతో కూడిన వర్షాలు కురుస్తాయని వాతావరణ శాఖ తెలిపింది.

గంటకు 30 నుంచి 40 కిలోమీటర్ల వేగంతో ఈదురు గాలులు వీచే అవకాశం ఉందని అధికారులు హెచ్చరించారు. నిన్న మహబూబాబాద్, నిర్మల్, నిజామాబాద్, వరంగల్ జిల్లాలకు ఆరెంజ్ అలర్ట్ జారీ చేయగా, ఈరోజు ఆదిలాబాద్, జగిత్యాల, జోగులాంబ గద్వాల, నారాయణపేట జిల్లాలకు ఎల్లో అలర్ట్ జారీ చేశారు.

హైదరాబాద్‌లో ఉదయం ఎండ, మధ్యాహ్నం మేఘావృతం, సాయంత్రం తేలికపాటి జల్లులు పడే అవకాశం ఉంది. ప్రజలు అప్రమత్తంగా ఉండాలని వాతావరణ శాఖ సూచించింది.

ఈ నెల 5 రోజుల పాటు రాష్ట్రంలో విస్తారంగా వర్షాలు కురుస్తాయని, తేలికపాటి నుంచి భారీ వర్షాల వరకు వివిధ ప్రాంతాల్లో నమోదయ్యే అవకాశం ఉందని అధికారులు వెల్లడించారు. వర్షాల నేపథ్యంలో ప్రజలు తగు జాగ్రత్తలు తీసుకోవాలని సూచించారు.