తెలంగాణలో రాబోయే 5 రోజుల్లో విస్తారంగా వర్షాలు: భారీ వర్ష హెచ్చరిక

నైరుతి రుతుపవనాలు తెలంగాణలో విస్తరించాయి. రాబోయే ఐదు రోజుల్లో రాష్ట్రవ్యాప్తంగా విస్తారంగా వర్షాలు కురిసే అవకాశం ఉందని వాతావరణ శాఖ అధికారులు తెలిపారు. ఈ రోజు 10 జిల్లాలకు భారీ వర్ష హెచ్చరిక జారీ చేసింది. హైదరాబాద్‌లో తేలికపాటి నుంచి మోస్తరు వర్షాలు పడే అవకాశం ఉంది.

నిన్న పెద్దపల్లి జిల్లాలో రాష్ట్ర ప్రభుత్వం వర్షమాపకాల ప్రకారం 18-19 సెంటీమీటర్ల వర్షపాతం నమోదైంది. శేర్లింగంపల్లిలో 12 సెం.మీ., ఉత్తర తెలంగాణ జిల్లాలైన మంచిర్యాల, జగిత్యాల, కుమరం భీమ్‌లో 12 సెం.మీ. వరకు భారీ వర్షం కురిసింది. మిగతా ప్రాంతాల్లో 5-7 సెం.మీ. వర్షం పడింది.

రానున్న ఐదు రోజులు అన్ని జిల్లాల్లోనూ విస్తారంగా వర్షాలు కురుస్తాయని IMD అలర్ట్ చేసింది. ఉత్తర తెలంగాణ, తూర్పు తెలంగాణ (భద్రాద్రి కొత్తగూడెం, ఖమ్మం, నల్గొండ) ప్రాంతాల్లో ఈ రోజు భారీ వర్షం అంచనా. వర్షాలతో పాటు ఉరుములు, మెరుపులు, ఈదురుగాలులు వీచే అవకాశం ఉందని IMD సీనియర్ అధికారి శ్రీనివాస్ తెలిపారు. ఉత్తర తెలంగాణలో గాలి వేగం గంటకు 40-50 కి.మీ., దక్షిణ తెలంగాణలో 30-40 కి.మీ. ఉండొచ్చు.

ఈ వర్షాలతో పెను ప్రమాదమేమీ లేదని, నేల తడిసి ఇంకిపోతుందని, వరదలు వచ్చే అవకాశం తక్కువని శ్రీనివాస్ వివరించారు. రైతులు వర్షపు నీటిని పొలాల్లో నిల్వ చేసుకోవాలని, డ్రెయిన్లలోకి వదలకూడదని సూచించారు. హైదరాబాద్‌లో రానున్న ఐదు రోజులు మోస్తరు నుంచి భారీ వర్షాలు కురుస్తాయని, నగరంలోని మూడు జిల్లాలకు భారీ వర్ష హెచ్చరిక జారీ చేసినట్లు తెలిపారు.

IMD ప్రతి 3 గంటలకు నౌకాస్టింగ్ బులెటిన్ ద్వారా కలర్ కోడెడ్ హెచ్చరికలు (పసుపు, ఆరెంజ్, రెడ్) జారీ చేస్తుంది. తీవ్రమైన హెచ్చరికలు ఉంటే రాష్ట్ర విపత్తు నిర్వహణ సంస్థకు సమాచారం అందించి, సెల్ ఫోన్ల ద్వారా ప్రజలకు హెచ్చరికలు పంపుతారు. రాబోయే రోజుల్లో తెలంగాణలో వర్షాలు కొనసాగే అవకాశం ఉంది.