కరీంనగర్, జగిత్యాలలో భారీ వర్షం కొనసాగింపు; రైతులకు, ప్రాజెక్టులకు లబ్ధి

కరీంనగర్, జగిత్యాల జిల్లాల్లో నిన్న రాత్రి నుంచి భారీ వర్షం కొనసాగుతోంది. పలు ప్రధాన రహదారులపై వర్షపు నీరు చేరింది. లోతట్టు ప్రాంతాల్లోకి వరద నీరు వస్తోంది.

వాతావరణ శాఖ విడుదల చేసిన గణాంకాల ప్రకారం, జగిత్యాల జిల్లా సారంగాపూర్ మండలంలో 18.93 సెంటీమీటర్ల వర్షపాతం నమోదైంది. బుగ్గారం మండలం సిరికొండలో 17.73 సెం.మీ., ఎండపల్లి మండలం గుల్లకోటలో 16.35 సెం.మీ. వర్షం పడింది. అటు కరీంనగర్ జిల్లా గంగాధర మండలంలో అత్యధికంగా 88.6 మి.మీ. వర్షం నమోదయింది. జిల్లా సగటు వర్షపాతం 42.7 మి.మీ.

వాగులు పొంగడంతో జగిత్యాల నుంచి ధర్మపురి మార్గంలో రెండు చోట్ల రాకపోకలకు అంతరాయం కలిగింది. అయితే, ఈ వర్షాలతో రైతులు సంతోషం వ్యక్తం చేస్తున్నారు. వరి నాట్లు చురుగ్గా సాగుతున్నాయి. కాళేశ్వరం ఎత్తిపోతల పథకం కింద ఎల్లంపల్లి ప్రాజెక్టుకు భారీగా ఇన్‌ఫ్లో వస్తోంది. మిడ్ మానేర్, లోయర్ మానేర్ లకు నీరు చేరుతోంది.

నిరంతరం వర్షం పడుతుండటంతో భూగర్భ జలాలు పెరిగే అవకాశం ఉందని అధికారులు అభిప్రాయపడుతున్నారు. వర్షాలు మరో 2-3 రోజులు కొనసాగే అవకాశం ఉన్నట్లు తెలిపారు.