మంచిర్యాల జిల్లా చెన్నూరులో భారీ వర్షం: రోడ్లపైకి వరద, అధికారులు బారికేడ్లు

మంచిర్యాల జిల్లా చెన్నూరులో నిన్న రాత్రి నుంచి కురుస్తున్న భారీ వర్షం కారణంగా రోడ్లపైకి వరద చేరింది. అక్కపల్లి కాజువేపై నుంచి భారీగా వరద ప్రవహిస్తోంది.

మంత్రి వివేక్ వెంకటస్వామి ఆదేశాలతో అధికారులు కాజువేపై ఇరువైపులా బారికేడ్లు ఏర్పాటు చేశారు. ఎంఆర్ఓ మల్లికార్జున్, సీఐ, ఎంపీడీవో వాగు ప్రవాహాన్ని పరిశీలించారు. అక్కపల్లి వాగు నుంచి వరద నీరు రోడ్డు డ్యామ్, లోయర్ డ్యామ్ మీదుగా ప్రవహిస్తున్నందున ఇది ప్రమాదకరంగా మారింది. ఇక్కడ హోమ్ గార్డు 24 గంటలు డ్యూటీ చేస్తున్నారు.

ప్రజలకు అధికారులు హెచ్చరికలు జారీ చేశారు. అత్యవసరమైతే తప్ప బయటకు రావద్దని, వాగులు చెరువుల దగ్గరకు వెళ్లొద్దని సూచించారు. ప్రమాదకరంగా ఉన్న ఇండ్లను ఖాళీ చేయాలని, ఎవరైనా సమాచారం ఇస్తే సురక్షిత ప్రాంతాలకు తరలిస్తామని తెలిపారు. పట్టణంలో భారీ వర్షం ఇంకా కొనసాగుతోంది.