రెండో పంట వేయొద్దని రైతులకు మంత్రి పొంగులేటి విజ్ఞప్తి

రాష్ట్రంలో కరువు పరిస్థితులు నెలకొన్న నేపథ్యంలో రైతులు రెండో పంట వేయొద్దని మంత్రి పొంగులేటి శ్రీనివాస్ రెడ్డి విజ్ఞప్తి చేశారు. తాగునీటి అవసరాలను దృష్టిలో పెట్టుకుని ఈ నిర్ణయం తీసుకోవాలని ఆయన కోరారు.

రెండో పంటకు నీరు ఇవ్వాలన్నా, కరెంటు ఇవ్వాలన్నా ఎంత డబ్బు ఖర్చు పెట్టినా అది దొరికే పరిస్థితి రాష్ట్రవ్యాప్తంగా లేదని మంత్రి చెప్పారు. ఇది రాష్ట్రానికి మాత్రమే కాదు, దేశవ్యాప్తంగా ఎదురవుతున్న సమస్య అని ఆయన అన్నారు. ఈ విషయంలో ప్రభుత్వం ఇంతకుముందే ప్రకటన చేసిందని ఆయన గుర్తు చేశారు.

రైతులు సహకరించాలని మంత్రి కోరారు. ఈ అంశంపై ప్రతిపక్షాలు ప్రేరేపించకూడదని, నిజాన్ని ప్రజలకు తెలియజేయాలని ఆయన విజ్ఞప్తి చేశారు. ఈ వ్యాఖ్యలపై ప్రతిపక్ష పార్టీల స్పందన లభ్యం కాలేదు.

రాష్ట్రానికి రావలసిన సహాయం కోసం ముఖ్యమంత్రి, సహచార మంత్రులతో కలిసి కేంద్ర ప్రభుత్వాన్ని కలిసే తేదీని అతి కొద్ది రోజుల్లో ప్రకటిస్తామని పొంగులేటి తెలిపారు. కేంద్రం అన్ని రకాల సహాయం అందిస్తుందని ఆయన విశ్వాసం వ్యక్తం చేశారు.