తెలంగాణలో 31 జిల్లాల్లో 365 మండలాలు కరువు ప్రభావిత ప్రాంతాలుగా ప్రకటన

తెలంగాణ ప్రభుత్వం 31 జిల్లాల్లోని 365 మండలాలను కరువు ప్రభావిత ప్రాంతాలుగా ప్రకటించింది. ఈ మేరకు విపత్తు నిర్వహణ శాఖ ఉత్తర్వులు (GO) విడుదల చేసింది.

వీటిలో 111 మండలాలను తీవ్ర కరువు ప్రాంతాలుగా గుర్తించారు. క్యాబినెట్ సబ్ కమిటీ నివేదిక, జిల్లా కలెక్టర్ల ప్రతిపాదనలు, క్షేత్ర స్థాయి పరిశీలన నివేదికల ఆధారంగానే ఈ జాబితా ప్రకటించినట్టు ప్రభుత్వం తెలిపింది. ప్రతి మండలంలోని 10 శాతం గ్రామాల్లో క్షేత్ర స్థాయి పరిశీలన చేశారు.

కరువు పరిస్థితులను అంచనా వేయడానికి కేంద్ర ప్రత్యేక బృందాన్ని పంపాలని రాష్ట్ర ప్రభుత్వం కోరింది. ₹20,000 కోట్ల ప్రత్యేక ప్యాకేజీ ఇవ్వాలని కేంద్రానికి విజ్ఞప్తి చేసింది. పంట నష్టం, తాగునీరు, పశుగ్రాసం, జలాశయాల పునరుద్ధరణలో కేంద్రం సహాయం అందించాలని కోరింది.

VB-G RAM G పథకం కింద అదనంగా 50 రోజుల పని కల్పించాలని కూడా కోరింది. అలాగే 1500 మెగావాట్ల అదనపు విద్యుత్ ఇవ్వాలని విజ్ఞప్తి చేసింది. 2026-27 ఏడాదికి GSDP పరంగా FRBM రుణ పరిమితిని 3 శాతం నుంచి 3.5 శాతానికి పెంచాలని కేంద్రాన్ని కోరింది.

ఈ డిమాండ్లపై రేపు అఖిల పక్ష సమావేశం నిర్వహించాలని ప్రభుత్వం నిర్ణయించింది. అన్ని పార్టీల నేతల అభిప్రాయాలు తీసుకుని, తర్వాత ఢిల్లీలో కేంద్ర నేతలను కలవాలని భావిస్తోంది.