ముంబైలో భారీ వర్షం: థానేలో 138.6 మి.మీ. వర్షపాతం, నాలుగు రోజులు ఆరెంజ్ అలర్ట్

ముంబై నగరంలో నిన్న రాత్రి నుంచి భారీ వర్షం కురుస్తోంది. థానే ప్రాంతంలో అత్యధికంగా 138.6 మిల్లీమీటర్ల వర్షపాతం నమోదైంది.

ఈ వర్షానికి రోడ్లు జలమయమయ్యాయి. లోతట్టు ప్రాంతాలు నీట మునిగాయి. పలు చోట్ల పెద్ద చెట్లు కూలిపోయాయి. థానే పరిధిలో 21 చెట్లు నేలకొరిగినట్టు అధికారులు తెలిపారు. కొన్ని కొండచరియలు, స్లాబ్‌లు, కాంపౌండ్ గోడలు కూలిపోయాయి.

బాండ్రా, అంధేరీ, పాల్ఘర్‌లో వర్షం తీవ్రంగా కురిసింది. ఈదురుగాలులతో కూడిన వర్షానికి రోడ్లు చెరువులను తలపించాయి. వాహనదారులు తీవ్ర ఇబ్బందులు ఎదుర్కొన్నారు. నవీ ముంబైలోని వ్యవసాయ మార్కెట్‌ను వరద ముంచెత్తింది. మెరైన్ డ్రైవ్ వద్ద సముద్ర అలలు ఎగిసిపడుతున్నాయి.

IMD నాలుగు రోజుల పాటు ముంబైకి ఆరెంజ్ అలర్ట్ జారీ చేసింది. భారీ నుంచి అతిభారీ వర్షాలు కురిసే అవకాశం ఉన్నందున ప్రజలు అప్రమత్తంగా ఉండాలని సూచించింది. రేపు రాయ్‌గడ్ జిల్లాకు రెడ్ అలర్ట్ ప్రకటించింది.