హైదరాబాద్‌లో భారీ వర్షం: కాప్రాలో 7 సెం.మీ వర్షపాతం నమోదు

హైదరాబాద్ నగరంలోని బంజారా హిల్స్, జూబ్లీ హిల్స్, కృష్ణా నగర్, యూసఫ్‌గూడ, సికింద్రాబాద్, బేగంపేట్, పాట్ని, బోయినపల్లి, రసూల్పూరా, తార్నాక, హబ్సిగూడ, హిమాయత్ నగర్, నారాయణగూడ, అమీర్‌పేట్, లకిడికపూల్, మాదాపూర్ తదితర ప్రాంతాల్లో భారీ వర్షం కురిసింది. కాప్రాలో అత్యధికంగా 7 సెంటీమీటర్ల వర్షపాతం నమోదైంది. ఉప్పల్ రాజీవ్ నగర్‌లో 4 సెం.మీ, మల్కాజ్‌గిరి వినాయక్ నగర్, కూకట్‌పల్లిలో 3 సెం.మీ, కుత్బుల్లాపూర్ అల్వాల్‌లో 2.7 సెం.మీ, హిమాయత్ నగర్ శేర్లింగంపల్లిలో 2 సెం.మీ వర్షపాతం రికార్డయింది.

కుండపోతగా వర్షం కురవడంతో పలు రోడ్లు జలమయమయ్యాయి. ప్రధాన కూడళ్లలో ట్రాఫిక్ నిలిచిపోయింది. ద్విచక్ర వాహనదారులు మెట్రో పిల్లర్ల కింద ఆశ్రయం పొందారు. మరోవైపు, ఈ వర్షంతో ఉదయం నుంచి వేధిస్తున్న ఉక్కపోత నుంచి ప్రజలకు ఉపశమనం లభించింది.

నగర శివార్లతో పాటు వికారాబాద్ జిల్లా కొడంగల్‌లో 10 సెంటీమీటర్లకు పైగా వర్షపాతం నమోదైంది. సంగారెడ్డి జిల్లా సిర్గాపూర్‌లో 7.3 సెం.మీ, మేడ్చల్ మల్కాజ్‌గిరి కాప్రాలో 7 సెం.మీ, రంగారెడ్డి కొండదుర్గలో 6.7 సెం.మీ వర్షం పడింది. వికారాబాద్, సంగారెడ్డి, రంగారెడ్డి, మేడ్చల్, మంచిర్యాల, నిర్మల్, ఆదిలాబాద్, మెదక్ జిల్లాల్లోనూ భారీ నుంచి మోస్తరు వర్షాలు కురిశాయి.

ఉదయం ఎండ తీవ్రత ఉన్నా, మధ్యాహ్నం నుంచి వాతావరణం మారి భారీ వర్షం పడుతుందని IMD అంచనా వేసింది. రానున్న మూడు రోజుల పాటు ఇదే వాతావరణం కొనసాగే అవకాశం ఉంది. నగరంలో నీటి నిల్వ పాయింట్లలో మ్యాన్‌హోల్స్ తెరిచి వరద నీటిని డ్రెయిన్లలోకి మళ్లించడంతో ట్రాఫిక్ మందగమనం కొనసాగుతుందని అధికారులు తెలిపారు.