బంగాళాఖాతంలో మురసు తుఫాను.. మంగళవారం ఏపీ తీరం దాటే అవకాశం

బంగాళాఖాతంలో ఏర్పడిన వాయుగుండం బలపడి మురసు తుఫానుగా మారింది. ఇది మంగళవారం నెల్లూరు, నరసాపురం మధ్య తీరం దాటే అవకాశం ఉందని వాతావరణ విభాగం తెలిపింది.

ఆగ్నేయ బంగాళాఖాతం, అండమాన్ సముద్ర ప్రాంతాల్లో అల్పపీడనం ఏర్పడింది. అది పశ్చిమ దిశగా కదులుతూ శనివారం వాయుగుండంగా బలపడింది. ఆగ్నేయ బంగాళాఖాతంలో ఇది తీవ్ర వాయుగుండంగా మారుతుంది. ఆదివారం రాత్రికి తుఫానుగా, సోమవారానికి తీవ్ర తుఫానుగా బలపడే అవకాశం ఉంది.

శనివారం ఈ వాయుగుండం అండమాన్ నికోబార్‌కు 300 కిలోమీటర్ల దూరంలో ఉంది. చెన్నైకి తూర్పు ఆగ్నేయంగా 960 కిలోమీటర్లు, విశాఖపట్నానికి 930 కిలోమీటర్ల దూరంలో కేంద్రీకృతమైంది.

రానున్న మూడు రోజులు దక్షిణ ఆంధ్ర, రాయలసీమ జిల్లాల్లో అక్కడక్కడ భారీ వర్షాలు కురుస్తాయి. కొన్ని ప్రాంతాల్లో భారీ నుంచి అతి భారీ వర్షాలు కురిసే అవకాశం ఉంది. పలు జిల్లాల్లో మోస్తరు వర్షాలు కురిసే అవకాశం ఉంది. ఆదివారం సాయంత్రం కోస్తా తీరం వెంట గంటకు 40 నుంచి 60 కిలోమీటర్ల వేగంతో ఈదురుగాలులు వీస్తాయి. సోమవారం నుంచి గంటకు 65 నుంచి 85 కిలోమీటర్ల వేగంతో బలమైన గాలులు వీచే అవకాశం ఉంది.

ఇటీవల తీవ్ర తుఫాను నష్టం నుంచి రాష్ట్రం ఇంకా తేరుకోకముందే ఈ తుఫాను వస్తోంది. ఈ ఏడాది బంగాళాఖాతంలో ఏర్పడిన రెండో తుఫాను ఇది. ఈ తుఫానుకు మురసు అని పేరు పెట్టారు. ఇది తమిళ పదం. బుధవారం వరకు మత్స్యకారులు సముద్రంలో వేటకు వెళ్లరాదని విపత్తుల నిర్వహణ సంస్థ హెచ్చరించింది.