ఏపీ తీరం వైపు మరో వాయుగుండం.. తెలంగాణలో రెండు రోజులు వర్షాలు

అండమాన్ సముద్రంలో ఏర్పడిన అల్పపీడనం తీవ్ర అల్పపీడనంగా మారింది. రానున్న కొన్ని గంటల్లో ఇది వాయుగుండంగా మారే అవకాశం ఉందని IMD అంచనా వేసింది.

ఈ వాయుగుండం రేపు సాయంత్రానికి తీవ్ర వాయుగుండంగా బలపడవచ్చు. తర్వాత తుఫానుగా మారి ఏపీ తీరం దగ్గర క్రాస్ అయ్యే అవకాశం ఉందని వాతావరణ శాఖ తెలిపింది. దీని ప్రభావం తెలంగాణపై కూడా ఉండొచ్చని అధికారి మురళి చెప్పారు.

నిన్న తెలంగాణలో పలు ప్రాంతాల్లో తేలికపాటి నుంచి మోస్తారు వర్షాలు కురిశాయి. ములుగులో అత్యధికంగా 12 సెం.మీ. వర్షపాతం నమోదైంది. హైదరాబాద్ చుట్టుపక్కల 4 నుంచి 7 సెం.మీ. వర్షం పడింది. మధ్య తెలంగాణలో మాత్రమే వర్షాలు కురిశాయని, ఉత్తర, దక్షిణ ప్రాంతాల్లో పెద్దగా వర్షం పడలేదని అధికారి తెలిపారు.

ఈ వర్షాలకు గాలిలో తేమ శాతం, ఉష్ణోగ్రతలు పెరగడం కారణమని మురళి తెలిపారు. దీని వల్ల కొన్ని ప్రాంతాల్లో cumulonimbus మేఘాలు ఏర్పడి వర్షపాతం నమోదైంది. అర్ణబ్ తుఫాన్ అవశేషాల నుంచి వచ్చిన తేమ కూడా దీనికి తోడైందని ఆయన చెప్పారు.

నవంబర్ 2, 3 తేదీల్లో తెలంగాణ రాష్ట్రవ్యాప్తంగా తేలికపాటి నుంచి మోస్తారు వర్షాలు కురిసే అవకాశం ఉంది. ఒకటి రెండు జిల్లాల్లో భారీ వర్షాలు కూడా పడవచ్చు. ఏ జిల్లాల్లో ఎక్కువ వర్షపాతం ఉంటుందో ఈరోజు సాయంత్రం లేదా రేపు మధ్యాహ్నం వరకు స్పష్టం అవుతుంది. రాబోయే నాలుగైదు రోజుల పాటు గరిష్ట ఉష్ణోగ్రతలు 33-34 డిగ్రీలు, కనిష్ట ఉష్ణోగ్రతలు 22-23 డిగ్రీలు ఉంటాయని వాతావరణ శాఖ తెలిపింది.