హైదరాబాద్‌లో భారీ వర్షం, పలు జిల్లాలకు రెడ్ అలర్ట్

హైదరాబాద్ నగరంలో నిన్నటి నుంచి భారీ వర్షాలు కురుస్తున్నాయి. వాతావరణ శాఖ నేడు కూడా భారీ వర్షం సూచన చేసింది.

తెలంగాణలోని 10 జిల్లాలకు రెడ్ అలర్ట్ జారీ చేయగా, కొన్ని జిల్లాలకు ఆరెంజ్, ఎల్లో అలర్ట్‌లు జారీ చేశారు. రానున్న రెండు రోజుల పాటు భారీ వర్షాలు కొనసాగే అవకాశం ఉందని తెలిపారు.

గత రెండు రోజుల వర్షాలతో నగరంలోని ఎల్బీ నగర్, కూకట్‌పల్లి సహా పలు ప్రాంతాలు జలమయమయ్యాయి. లోతట్టు ప్రాంతాల్లోని అపార్ట్‌మెంట్లలోకి నీరు చేరి నివాసితులు ఇబ్బందులు పడ్డారు. అధికారులు DRF, NDRF బృందాలతో నీటిని తోడించే చర్యలు చేపట్టారు.

ప్రజలు, ముఖ్యంగా ఐటీ కారిడార్‌లో పనిచేసే ఉద్యోగులు, సాయంత్రం ట్రాఫిక్ జామ్ నివారించేందుకు తొందరగా లాగౌట్ చేసుకోవాలని లేదా వర్క్ ఫ్రమ్ హోమ్ చేసుకోవాలని అధికారులు సూచించారు. నాలాలు, విద్యుత్ స్తంభాల వద్దకు వెళ్లొద్దని హెచ్చరించారు.

ఇటీవలి వర్షాల్లో ఒక వ్యక్తి నాలాలో పడి కనిపించకుండా పోయిన సంఘటన నేపథ్యంలో, అధికారులు మరింత అప్రమత్తంగా ఉన్నారు. లోతట్టు ప్రాంతాల ప్రజలు సురక్షిత ప్రాంతాలకు తరలి వెళ్లాలని, GHMC, HYDRAA బృందాలు పరిస్థితిని ఎప్పటికప్పుడు పర్యవేక్షిస్తున్నాయని చెప్పారు.