ఎమ్మిగనూరులో భారీ వర్షం: వాగులు పొంగి రాకపోకలు నిలిచిపోయాయి

కర్నూలు జిల్లాలో భారీ వర్షం కురిసింది. ముఖ్యంగా ఎమ్మిగనూరు మండలంలో కుండపోత వాన పడింది. దీంతో వాగులు, వంకలు ప్రమాదకరంగా పొంగిపొర్లాయి.

కడివేళ సమీపంలోని కప్పల వాగు ఒక్కసారిగా ఉగ్రరూపం దాల్చింది. ఎగువ ప్రాంతాల నుండి భారీగా నీరు వచ్చి చేరడంతో వాగు ఉధృతంగా ప్రవహించింది. ఎమ్మిగనూరు-పత్తికొండ మార్గంలో రాకపోకలు పూర్తిగా నిలిచిపోయాయి. గోనెగండ్ల మండలంలోని గంచహళ్ళ, అగ్రహారం గ్రామాల వద్ద కూడా వాగులు పొంగాయి. దీంతో వాహనదారులు తీవ్ర ఇబ్బందులు ఎదుర్కొన్నారు.

ఆలూరు డివిజన్ పరిధిలోనూ భారీ వర్షం కురిసింది. ఆలూరు-గుంతకల మధ్య ఉన్న కళ్ళెవాగు వంతెన పై నుంచి నీరు ప్రవహించింది. ఆ మార్గంలో రాకపోకలు నిలిచాయి. కొందరు వాహనదారులు ప్రమాదకరంగా వాగు దాటే ప్రయత్నం చేశారు. హోలగుంద మండలంలో గజ్రహ్ళ గ్రామం వద్ద పోతప్ప వాగు పొంగిపొర్లింది.

ఎగువ ప్రాంతాల్లో కురిసిన వర్షానికి వేదవతి నదికి నీరు చేరింది. తుంగభద్ర డ్యామ్‌కు ఈ సీజన్‌లో మొదటిసారి ఇన్‌ఫ్లో మొదలైంది. 635 క్యూసెక్కుల ఇన్‌ఫ్లో నమోదు కాగా, 10 టీఎంసీల నీరు నిల్వ ఉంది. అధికారులు పరిస్థితిని గమనిస్తున్నారు.