తెలంగాణలో భారీ వర్షాలు: 8 జిల్లాలకు ఎల్లో అలర్ట్

వాతావరణ శాఖ ప్రకటన ప్రకారం, తెలంగాణలో నేటి నుంచి నాలుగు రోజుల పాటు తేలికపాటి నుంచి ఓ మోస్తరు వర్షాలు కురిసే అవకాశం ఉంది. మొదటి రెండు రోజుల్లో కొన్ని జిల్లాల్లో అక్కడక్కడ భారీ వర్షాలు పడతాయని హెచ్చరించింది. ఈ నేపథ్యంలో ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, కరీంనగర్, పెద్దపల్లి జిల్లాలకు ఎల్లో అలర్ట్ జారీ చేసింది.

నైరుతి రుతుపవనాలు మళ్లీ చురుకుగా కదులుతున్నాయి. అవి ఇప్పటికే దక్షిణ తెలంగాణలోని కొన్ని ప్రాంతాలకు విస్తరించాయి. పశ్చిమ మధ్య బంగాళాఖాతంలో ఉపరితల ఆవర్తనం కొనసాగుతుండటంతో వర్షాలకు అనుకూల పరిస్థితులు ఏర్పడ్డాయి. వచ్చే రెండు రోజుల్లో రుతుపవనాలు రాష్ట్రమంతటా విస్తరించే అవకాశం ఉందని అధికారులు తెలిపారు.

ఇదిలా ఉండగా, నాగర్ కర్నూల్, మహబూబ్ నగర్, గద్వాల, వికారాబాద్ జిల్లాల్లోనూ వర్షాలు ఎక్కువగా పడే అవకాశం ఉంది. హైదరాబాద్‌లో కొన్ని ప్రాంతాల్లో ఉదయం ఎండ వాతావరణం ఉన్నా, సాయంత్రం భారీ వర్షం పడే అవకాశం ఉన్నట్లు వాతావరణ శాఖ వెల్లడించింది.

ఈ వర్షాల వల్ల రాష్ట్రంలో గరిష్ట ఉష్ణోగ్రతలు తగ్గి సాధారణ స్థాయికి చేరతాయి. ఎండల తీవ్రత నుంచి ప్రజలకు ఉపశమనం లభించే అవకాశం ఉంది.