ఏపీలో ఈ రోజు ఉరుములు, మెరుపులు, ఈదురుగాలులతో కూడిన వర్షాలు

ఏపీలో ఈ రోజు తీర ప్రాంతాలు, రాయలసీమ ప్రాంతాల్లో ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉందని వాతావరణ శాఖ హెచ్చరించింది. ఉపరితల ఆవర్తనం ప్రభావంతో ఈ వర్షాలు కురుస్తాయని అధికారులు తెలిపారు.

ఉమ్మడి తూర్పు గోదావరి, ఉమ్మడి కృష్ణ, గుంటూరు జిల్లాల్లో పిడుగులతో మోస్తారు వర్షాలు పడే అవకాశం ఉంది. రాయలసీమ జిల్లాల్లోనూ వర్షాలు కురిసే అవకాశం ఉంది. పశ్చిమ-మధ్య బంగాళాఖాతంలో సముద్ర మట్టానికి 1.5 నుంచి 3 కిలోమీటర్ల ఎత్తులో ఉపరితల ఆవర్తనం కేంద్రీకృతమై ఉంది. దీని ప్రభావంతో ఏపీ వైపు ద్రోణి కొనసాగుతోంది.

నిన్న పార్వతీపురం జిల్లాలో 30.5 మిల్లీమీటర్లు, గుంటూరు జిల్లా తాడేపల్లిలో 27.2 మి.మీ, అనకాపల్లి జిల్లా నరసింపట్నంలో 18.5 మి.మీ వర్షపాతం నమోదైంది. ఇవాళ మధ్యాహ్నం, సాయంత్రం వేళల్లో 40-50 కిలోమీటర్ల వేగంతో గాలులు వీచుతాయని, ఉరుములు, మెరుపులతో బలమైన వర్షాలు పడే అవకాశం ఉందని IMD హెచ్చరించింది.

ఈ నేపథ్యంలో తీర ప్రాంత మత్స్యకారులు, రైతులు అప్రమత్తంగా ఉండాలని అధికారులు సూచించారు. పిడుగులు పడే అవకాశం ఉన్నందున వ్యవసాయ పనుల్లో నిమగ్నమయ్యే రైతులు జాగ్రత్తలు తీసుకోవాలని సూచించారు.

మరోవైపు నైరుతి రుతుపవనాలు కేరళలో ప్రవేశించాయి. మరో 3-4 రోజుల్లో ఏపీకి రావొచ్చని అంచనా. ప్రస్తుతం ప్రీ-మాన్సూన్ వర్షాలు కురుస్తున్నాయి. ఉదయం పూట ఎండ తీవ్రత ఎక్కువగా ఉన్నా, మధ్యాహ్నం నుంచి వాతావరణం మారి వర్షాలు పడుతున్నాయి. నిన్న కొన్ని ప్రాంతాల్లో 43 డిగ్రీలకు పైగా ఉష్ణోగ్రతలు నమోదయ్యాయి.