ఢిల్లీ, మహారాష్ట్ర, గుజరాత్, ఉత్తరాఖండ్ సహా పలు రాష్ట్రాల్లో భారీ వర్షాలు; ప్రాణనష్టం, రవాణా స్తంభం

దేశంలోని పలు రాష్ట్రాల్లో భారీ వర్షాలు విధ్వంసం సృష్టించాయి. ఢిల్లీ, మహారాష్ట్ర, గుజరాత్, జమ్మూ కాశ్మీర్, ఉత్తరాఖండ్ సహా అనేక చోట్ల ఆకస్మిక వరదలు, కొండచరియలు విరిగిపడటం, భవనాలు కూలడం వంటి సంఘటనలు చోటుచేసుకున్నాయి. ప్రాణనష్టంతోపాటు రైళ్లు, విమాన సర్వీసులకు తీవ్ర అంతరాయం ఏర్పడింది.

ఢిల్లీలో గత రాత్రి నుంచి కురిసిన భారీ వర్షాలకు నగరంలోని పలు ప్రాంతాలు జలదిగ్బంధంలో చిక్కుకున్నాయి. రోహిణి ప్రాంతంలో నాలుగు అంతస్తుల నిర్మాణంలో ఉన్న భవనం కూలి ముగ్గురు మృతిచెందారు. మరోవైపు రోడ్లు జలమయం కావడంతో ట్రాఫిక్ జామ్ ఏర్పడింది. వాహనాల రాకపోకలకు ఆటంకం కలిగింది. వాతావరణ శాఖ రెడ్, ఆరెంజ్ అలర్ట్లు జారీ చేసింది.

మహారాష్ట్రలో అత్యంత భారీ వర్షాలు కురుస్తున్నాయి. పింపిడి చింజివాడ్లో భవనం దెబ్బతిని 9 మందిని రెస్క్యూ బృందాలు రక్షించాయి. మరో 11 మంది శిధిలాల కింద చిక్కుకున్నారు. సహాయక చర్యలు కొనసాగుతున్నాయి. ఠానే జిల్లాలో ముగ్గురు ప్రాణాలు కోల్పోగా, 800 మందిని సురక్షిత ప్రాంతాలకు తరలించారు. ముంబైలో లోకల్ రైళ్లు, పుణే మార్గంలో రైల్వే సేవలకు అంతరాయం ఏర్పడింది.

గుజరాత్లోని సూరత్ నగరం భారీ వర్షాలతో జలమయమైంది. గత కొన్ని రోజులుగా కురుస్తున్న వర్షాల కారణంగా 9 మంది మృతి చెందినట్లు అధికారులు తెలిపారు. లోతట్టు ప్రాంతాల్లో వేలాది మందిని సురక్షిత ప్రాంతాలకు తరలించారు. వరద బాధితులకు ఆహారం, నిత్యావసర వస్తువులు సరఫరా చేశారు.

జమ్మూ కాశ్మీర్లోని దోడా జిల్లాలో ఆకస్మిక వరదలు సంభవించాయి. కేంద్ర హోమ్ మంత్రి అమిత్ షా, ముఖ్యమంత్రి ఉమర్ అబ్దుల్లాతో పరిస్థితిని చర్చించారు. ఉత్తరాఖండ్లో కొండచరియలు విరిగిపడి ప్రధాన రహదారులు మూసుకుపోయాయి. అలకనంద, మందాకిని నదులు ప్రమాద స్థాయికి చేరుకున్నాయి. హరిద్వార్ నగరం జలదిగ్బంధంలో చిక్కుకుంది. ప్రతికూల వాతావరణం కారణంగా డెహ్రాడూన్లో పాఠశాలలకు సెలవు ప్రకటించారు.

రాబోయే రోజుల్లో దేశంలోని పలు ప్రాంతాల్లో భారీ నుంచి అతిభారీ వర్షాలు కురిసే అవకాశం ఉందని భారత వాతావరణ శాఖ హెచ్చరించింది. ప్రజలు అప్రమత్తంగా ఉండాలని సూచించింది.