కామారెడ్డిలో భారీ వర్షాలు, వరద; తాత్కాలిక వంతెన కొట్టుకుపోయింది

కామారెడ్డి జిల్లాలో రాత్రి కురిసిన భారీ వర్షాలకు పలు గ్రామాలు జలమయమయ్యాయి. వరద ప్రవాహం కారణంగా రహదారులు దెబ్బతిన్నాయి, తాత్కాలిక వంతెన కొట్టుకుపోయింది.

నిజాంసాగర్ ప్రాజెక్టులోకి 6060 క్యూసెక్కుల వరద ప్రవాహం చేరింది. ప్రాజెక్టులో ప్రస్తుత నీటిమట్టం 1397.57 అడుగులకు చేరగా, 17.80 టీఎంసీల మొత్తం నిల్వ సామర్థ్యానికి గాను 8.93 టీఎంసీల నీరు నిల్వ ఉంది. ఆయకట్టు రైతులు సంతోషం వ్యక్తం చేస్తున్నారు.

నాగిరెడ్డిపేట మండలం పరిధిలోని పోచారం ప్రాజెక్టుకు లింగంపేట వాగు ద్వారా 2150 క్యూసెక్కుల వరద చేరింది. ప్రస్తుత నీటిమట్టం 462 అడుగులు, నిల్వ 1.575 టీఎంసీలు. జుక్కల్ నియోజకవర్గంలోని కౌలాస్నాల ప్రాజెక్టుకు 555 క్యూసెక్కుల వరద ప్రవాహం వచ్చి నీటిమట్టం 456.2 అడుగులకు చేరిందని, నిల్వ 0.84 టీఎంసీలుగా ఉన్నట్లు జలవనరుల శాఖ అధికారులు తెలిపారు.

కామారెడ్డి-ఎల్లారెడ్డి ప్రధాన రహదారిపై ఏర్పాటు చేసిన తాత్కాలిక వంతెన వరదకు పూర్తిగా దెబ్బతింది. గత ఏడాది కూడా వరదలో ఈ వంతెన కొట్టుకుపోగా, అప్పుడు సీఎం రేవంత్ రెడ్డి పర్యటించి త్వరగా నిర్మాణం చేపట్టాలని సూచించారు. శాశ్వత బ్రిడ్జ్ పూర్తి కాకపోవడంతో తాత్కాలికంగా నిర్మించిన వంతెన మళ్లీ కొట్టుకుపోయింది. దీంతో వాహన రాకపోకలు పూర్తిగా నిలిచిపోయాయి.

పిట్లం, పెద్ద కొడపగల్ మండలాల్లో పంటలు నీట మునిగాయి. పిట్లం-తిమ్మనగర మధ్య వంతెనపై నీరు పారడంతో రాకపోకలు బంద్ అయ్యాయి. కంబార్ గ్రామంలో ఇళ్లలోకి వర్షపు నీరు చేరింది. బాన్సవాడ మండలం మొగలానపల్లిలో కూడా ఇళ్లలోకి వరద ప్రవేశించి గృహోపకరణాలు, ఆహార పదార్థాలు తడిసి నష్టం జరిగింది. కుటుంబ సభ్యులు వృద్ధులు, చిన్నారులను సురక్షిత ప్రాంతాలకు తరలించారు.

జిల్లా యంత్రాంగం పరిస్థితిని పర్యవేక్షిస్తోంది. శాశ్వత బ్రిడ్జి నిర్మాణం త్వరగా పూర్తిచేయాలన్న డిమాండ్ నెలకొంది.