ములుగు జిల్లాలో భారీ వర్షాలతో వాగులు పొంగి, గిరిజన గ్రామాలకు రాకపోకలు నిలిచిపోయాయి

ములుగు జిల్లాలో గత రెండు మూడు రోజులుగా కురుస్తోన్న భారీ వర్షాల వల్ల వాగులు ఉప్పొంగి ప్రవహిస్తున్నాయి. దీంతో జిల్లాలోని పలు గిరిజన గ్రామాలు బాహ్య ప్రపంచంతో సంబంధాలు తెగిపోయి జలదిగ్బంధనంలో చిక్కుకున్నాయి.

వెంకటాపురం మండలంలో బల్లకట్టు కుక్కతోగు, జిన్నెల వాగులు ఉధృతంగా ప్రవహిస్తున్నాయి. ముఖ్యంగా జిన్నెల వాగు నీరు బోదాపురం-తిప్పాపురం రహదారిపైకి చేరడంతో ఆ మార్గం పూర్తిగా మూతపడింది. దీని ప్రభావంతో పెంకవాగు, తడపల, తిప్పాపురం, కలిపాక, తరితర వంటి అటవీ గిరిజన గ్రామాలకు రాకపోకలు పూర్తిగా నిలిచిపోయాయి.

వరద ముప్పును గుర్తించిన అధికారులు అప్రమత్తమయ్యారు. పోలీసు సిబ్బంది వరద ప్రాంతాల్లో విధులు నిర్వహిస్తూ సహాయక చర్యలు చేపడుతున్నారు. వరద నీరు గ్రామాలను చుట్టుముట్టడంతో ప్రజలు వైద్య సేవలు, అత్యవసర వస్తువుల కోసం తీవ్ర ఇబ్బందులు ఎదుర్కొంటున్నారు. అత్యవసర పరిస్థితుల్లో గిరిజన ప్రజలు తమ ప్రాణాలను సైతం లెక్కచేయకుండా పడవలపై ప్రయాణాలు చేస్తున్నారు.