ఉమ్మడి వరంగల్ జిల్లాలో భారీ వర్షాలు, రోడ్లు జలమయం, ఒకరు గల్లంతు

ఉమ్మడి వరంగల్ జిల్లాలో గత రెండు రోజులుగా భారీ వర్షాలు కురుస్తున్నాయి. వర్షాభావంతో దిగులు చెందిన రైతుల్లో ఈ వానలు కొత్త ఆశ నింపుతున్నాయి.

ములుగు జిల్లాలో వాగులు, వంకలు ఉవ్వెత్తున ప్రవహిస్తున్నాయి. బాజేడు మండలం చీకుపల్లి పెద్ద గొల్లగూడం ఇసుకబాగు డైవర్షన్ రోడ్డు దెబ్బతింది. జిల్లా కలెక్టర్ బోర్ఖడే హేమంత్ సహదేవరావు సంఘటనా స్థలాన్ని సందర్శించారు. ప్రత్యామ్నాయ రహదారి పునరుద్ధరణ చేపట్టాలని ఆదేశించారు.

తెలంగాణ-ఛత్తీస్గఢ్ రాష్ట్రాలను అనుసంధానించే జాతీయ రహదారిపై వాహనాల రాకపోకలు తాత్కాలికంగా నిలిపివేశారు. ఎగువన కురిసిన వర్షాలకు బొగత జలపాతం ఉగ్రరూపం దాల్చింది. అక్కడ పర్యాటకుల ప్రవేశం నిలిపేసినట్లు అధికారులు తెలిపారు.

పాలెం మధ్యతరహ జలాశయం నిండుతోంది. మేడారం సమీపంలో జంపన్న వాగు ఉధృతంగా ప్రవహిస్తోంది. లెవెల్ బ్రిడ్జి మునిగిపోయింది. ఘట్కేసర్కు చెందిన తిమ్మయ్య అనే వ్యక్తి పుణ్యస్నానం చేస్తూ గల్లంతయ్యారు.

భూపాలపల్లి జిల్లాలో కూడా భారీ వర్షాలు కురుస్తున్నాయి. గొర్లవీడు వద్ద కల్వర్టు నిర్మాణానికి వేసిన తాత్కాలిక మట్టి రహదారి కొట్టుకుపోయింది. కాటారం-మేడారం రహదారిపై పెద్దవాగు ఉద్ధృతితో 15 గ్రామాలకు రాకపోకలు నిలిచిపోయాయి.

వరంగల్, హనుమకొండ, మహబూబాబాద్, జనగాం జిల్లాల్లో మోస్తరు వర్షాలు పడుతున్నాయి. భారీ వర్షాలు కొనసాగుతున్నందున ప్రజలు అప్రమత్తంగా ఉండాలని భూపాలపల్లి జిల్లా కలెక్టర్ రాహుల్ శర్మ సూచించారు.

వర్షాలు పంటలకు మేలు చేస్తున్నాయని రైతులు సంతోషం వ్యక్తం చేస్తున్నారు.