రాజన్న సిరిసిల్లలో భారీ వర్షాలు, మిడ్ మానేర్‌కు స్వల్ప ఇన్‌ఫ్లో

రాజన్న సిరిసిల్ల జిల్లాలో గత రెండు రోజులుగా కుండపోత వాన కురుస్తోంది. వాతావరణ శాఖ ఆరెంజ్ అలర్ట్ జారీ చేసి భారీ వర్షాలు పడే అవకాశం ఉందని అప్రమత్తం చేసింది. వాగులు పొంగి పొర్లుతున్నాయి.

అయినప్పటికీ, జిల్లాలోని ప్రాజెక్టుల నీటి నిల్వలు ఆందోళనకరంగానే ఉన్నాయి. మిడ్ మానేర్ ప్రాజెక్ట్ సామర్థ్యం 27.55 టీఎంసీలు కాగా ప్రస్తుతం 7.45 టీఎంసీలు మాత్రమే నీరు ఉంది. నీటి మట్టం 318 మీటర్లకు గాను 307 మీటర్లే ఉంది. వేములవాడ మూలవాగు, సిరిసిల్ల మానేరు వాగు నుండి స్వల్పంగా ఇన్‌ఫ్లో వస్తోంది.

శ్రీరామసాగర్ ప్రాజెక్ట్, ఎల్లంపల్లి నుండి వరద నీరు రాకపోవడంతో మిడ్ మానేర్‌కు పెద్దగా నీటి ప్రవాహం లేదు. ప్రస్తుతం మిషన్ భగీరథకు 112 క్యూసెక్కుల నీటిని విడుదల చేస్తున్నారు.

జిల్లాలోని ఇతర రిజర్వాయర్లలో నీటి నిల్వలు: నర్మాల ప్రాజెక్ట్ 2 టీఎంసీల సామర్థ్యానికి 0.601 టీఎంసీ, మల్కాపేట 3 టీఎంసీలకు 1.32 టీఎంసీ, అన్నపూర్ణ రిజర్వాయర్ 3.5 టీఎంసీలకు 1.45 టీఎంసీ, కరీంనగర్ ఎల్ఎండీ 24 టీఎంసీలకు 5.449 టీఎంసీ మాత్రమే ఉన్నాయి. గత సంవత్సరం ఇదే సమయంలో మిడ్ మానేర్ నిండుకుండలా ఉండేదని, ఈసారి ఎల్‌నినో ప్రభావంతో వర్షాలు తగ్గడంతో నీటి నిల్వలు బాగా తక్కువలో ఉన్నాయి.