తెలంగాణలో జూన్ 18 నుంచి భారీ వర్షాలు: వాతావరణ శాఖ

నైరుతి రుతుపవనాల ప్రస్తుత పురోగతి మందగించింది. గాలి దిశ మారడంతో పాటు అనుకూల పరిస్థితులు లేక రుతుపవనాలు నెమ్మదిగా కదులుతున్నాయని వాతావరణ శాఖ అధికారులు తెలిపారు. దీంతో రాష్ట్రమంతటా రుతుపవనాలు విస్తరించడానికి మరో నాలుగైదు రోజులు పట్టొచ్చని చెప్పారు.

తెలంగాణలో ప్రస్తుతం 5.8 కి.మీ. ఎత్తులో ఉపరితల ఆవర్తనం కొనసాగుతోంది. దీని ప్రభావంతో ఈనెల 14 నుంచి 17 వరకు ఒకటి రెండు చోట్ల తేలికపాటి నుంచి మోస్తరు వర్షాలు పడతాయి. సాయంత్రం వేళల్లోనే ఎక్కువ వర్షం కురిసే అవకాశం ఉంది. జూన్ 18, 19, 20 తేదీల్లో మాత్రం ఇసోలేటెడ్ ప్రాంతాల్లో భారీ వర్షాలు కురుస్తాయని అధికారులు హెచ్చరించారు.

గంటకు 30-40 కి.మీ. వేగంతో గాలులు వీస్తాయి. జూన్ 14-20 మధ్య ఉరుములు, మెరుపులతో కూడిన వర్షం పడుతుంది. ఈదురు గాలులు 40-50 కి.మీ. వేగంతో వీచే అవకాశం ఉంది. ఎల్‌నినో ప్రభావంతో ఈ ఏడాది వర్షాలు తక్కువ సమయంలో ఎక్కువగా పడొచ్చు. మొత్తమ్మీద వీక్ మాన్‌సూన్ పరిస్థితులు కనిపిస్తున్నాయి.

జూన్‌లో వర్షాలు ఆశాజనకంగా ఉన్నా, జూలై-ఆగస్టులో వర్షపాతం తగ్గొచ్చని వాతావరణ నిపుణులు చెబుతున్నారు. దీంతో ఆ తర్వాత కొన్ని ప్రాంతాల్లో కరువు పరిస్థితులు ఏర్పడే అవకాశం ఉంది. రైతులు అప్రమత్తంగా ఉండాలని సూచిస్తున్నారు.