కామారెడ్డి జిల్లాలో భారీ వర్షాలు: వంతెన దెబ్బతిన్న ప్రాంతాన్ని కలెక్టర్, ఎస్పీ పరిశీలన

కామారెడ్డి జిల్లాలో భారీ వర్షాలు కురుస్తున్నాయి. జిల్లాలో సగటున 65 మి.మీ. వర్షపాతం నమోదైంది. కామారెడ్డి పట్టణంలో 182 మి.మీ. వర్షం కురిసింది. పిట్లం, గాంధారి మండలాల్లో కూడా భారీ వర్షం పడింది.

లింగంపేట మండల కేంద్రంలో ఒక వంతెన భారీ వర్షానికి దెబ్బతింది. దీన్ని జిల్లా కలెక్టర్ ఆశిష్ షంగ్వాన్, ఎస్పీ రాజేష్ చంద్ర ప్రత్యక్షంగా పరిశీలించారు. మరమ్మతు పనులను వారు స్వయంగా పర్యవేక్షించారు. జిల్లాలో 14 రోడ్లపై నీరు ప్రవహిస్తున్నందున ఆయా చోట్ల బందోబస్తు చేశారు.

రాంపల్లి కొనతడ్డ వాగులో ఒక వ్యక్తి నీట ప్రవహంలో చిక్కుకుని గల్లంతయ్యాడు. అతడి కోసం పోలీసులు, రెవెన్యూ సిబ్బంది గాలింపు చర్యలు కొనసాగిస్తున్నారు. ఇప్పటివరకు మృతదేహం లభించలేదని కలెక్టర్ తెలిపారు.

అన్ని శాఖల అధికారులు అప్రమత్తంగా ఉన్నారు. పోలీస్, రెవెన్యూ, ఆర్ఎన్బీ, పిఆర్ ఇంజనీర్లు, ఎంపీడీవోలు, తహసీల్దార్లు ఫీల్డ్లో ఉండి పునరుద్ధరణ పనులు పర్యవేక్షిస్తున్నారు. కలెక్టర్ ప్రజలకు పలు సూచనలు చేశారు. పిడుగులు, ఉరుములతో కూడిన వర్షం పడే అవకాశం ఉన్నందున చేపల వేట, బయటి ప్రదేశాలకు వెళ్లడం నివారించాలన్నారు. అనవసర ప్రయాణాలు కూడా మానుకోవాలని కోరారు.

గత ఏడాది కామారెడ్డి చెరువు పొంగి జిఆర్ కాలనీ, హౌసింగ్ బోర్డ్ కాలనీ నీట మునిగాయి. ఈసారి చెరువు ఆక్రమణలు తొలగించి వెడల్పు పెంచారు. ప్రస్తుతం వరద నీరు సాఫీగా ప్రవహిస్తోంది. జిఆర్ కాలనీలో ముందు జాగ్రత్తగా మూడు ఇళ్లను ఖాళీ చేయించారు. కంట్రోల్ రూమ్ ఏర్పాటు చేసి అధికారులు అప్రమత్తంగా ఉన్నారు.