కామారెడ్డి జిల్లాలో భారీ వర్షం: 18 సెం.మీ వర్షపాతం, వాగులు పొంగి రాకపోకలకు అంతరాయం

కామారెడ్డి జిల్లాలో భారీ వర్షం కురిసింది. జిల్లా కేంద్రంలో 18 సెంటీమీటర్ల వర్షపాతం నమోదైంది. వాతావరణ శాఖ జిల్లాకు ఆరెంజ్ అలర్ట్ జారీ చేసింది.

భారీ వర్షాలతో జిల్లాలోని 16 వాగులు పొంగి ప్రవహిస్తున్నాయి. కామారెడ్డి-లింగంపేట మధ్య వాగు ఉప్పొంగడంతో ఆ మార్గంలో రాకపోకలు నిలిచిపోయాయి. పిట్లం-తిమ్మనగర్ మధ్య కూడా రాకపోకలు స్తంభించాయి. పిట్లం లోని కాకివాగు ఉద్ధృతంగా ప్రవహిస్తోంది.

కామారెడ్డిలోని పెద్ద చెరువు నిండి అలుగుపారుతోంది. స్థానికులు దీనివల్ల ఈ సీజన్లో నీటి ఇబ్బందులు ఉండవని భావిస్తున్నారు. అయితే భారీ వర్షం కారణంగా లోతట్టు ప్రాంతాల్లోని ఇళ్లలోకి నీరు చేరింది. GR కాలనీ, టీచర్స్ కాలనీల్లో కొన్ని ఇళ్లలో నీళ్లు వచ్చాయి.

అధికారులు బాధితులను సురక్షిత ప్రాంతాలకు తరలించేందుకు ఏర్పాట్లు చేస్తున్నారు. గత ఏడాది కూడా ఇదే సమయంలో భారీ వర్షం వల్ల నష్టం జరిగింది. మరోసారి భారీ వర్షం పడితే మళ్లీ నీరు నిలిచే ప్రమాదం ఉందని ప్రజలు ఆందోళన చెందుతున్నారు.