వరంగల్ జిల్లాలో భారీ వర్షాలు: 25 గ్రామాలకు రాకపోకలు నిలిపివేత

వరంగల్ జిల్లాలో భారీ వర్షాలు కురుస్తున్నాయి. ములుగు, భూపాలపల్లి, మహబూబాబాద్ జిల్లాల్లో భారీ వర్షం పడుతుండగా, వరంగల్, హనుమకొండ, జనగామ జిల్లాల్లో చిరుజలులు కురుస్తున్నాయి.

ములుగు జిల్లాలోని వెంకటాపురం, వాజేడు మండలాల్లో భారీ వర్షం కారణంగా హైదరాబాద్-ఛత్తీస్గడ్ జాతీయ రహదారిపై తాత్కాలిక వంతన తెగిపోయింది. దీంతో వెంకటాపురం మండలంలోని గ్రామాలకు రాకపోకలు నిలిచిపోయాయి.

మంగపేట మండలంలోని కొమిటిపల్లి మార్గంలో బలమైన ఈదురుగాలులతో 150కి పైగా చెట్లు నేలకొరిగాయి. భోగత్త జలపాతం భారీగా ఉప్పొంగి ప్రవహిస్తోంది. ప్రమాదాలను దృష్టిలో ఉంచుకుని అధికారులు జలపాతం సందర్శనను నిలిపివేశారు.

వాజేడు మండలంలో 130 మిల్లీమీటర్ల వర్షపాతం నమోదైంది. జంపన వాగు, దయ్యాల వాగు ఉద్ధృతంగా ప్రవహిస్తున్నాయి. చీకుపల్లి దగ్గర ఇసక వాగుపై నిర్మించిన తాత్కాలిక వంతన కొట్టుకుపోవడంతో 25 గ్రామాలకు బాహ్య ప్రపంచంతో సంబంధాలు తెగిపోయాయి.

వరంగల్ నగరంలో చిరుజలులు కొనసాగుతున్నాయి. లోతట్టు ప్రాంతాలు జలమయమయ్యాయి. హనుమకొండ బస్టాండ్ నీట మునిగింది. రాకపోకలకు అంతరాయం ఏర్పడింది.

ఈ వర్షాలు రైతులకు ఉపశమనం కలిగించాయి. జలాశయాలు నిండే అవకాశం ఉంది. అధికారులు అప్రమత్తంగా ఉండాలని, సిబ్బందికి సెలవులు రద్దు చేశామని తెలిపారు.