ఉత్తర భారతంలో భారీ వర్షాలు: జమ్మూలో కొండచరియలు, జాతీయ రహదారి మూసివేత; ఐఎండీ యెల్లో అలర్ట్

ఉత్తరప్రదేశ్, హర్యాణ, హిమాచల్ ప్రదేశ్, జమ్మూ కాశ్మీర్లో కుండపోత వర్షాలు కురుస్తున్నాయి. బంగాళాఖాతం నుండి తేమ గాలులు వీయడంతో వాయువ్య భారతంలో వరుసగా వానలు పడుతున్నాయి.

జమ్మూ కాశ్మీర్లోని పూంచి సెక్టార్లో కొండచరియలు విరిగిపడి రాకపోకలు నిలిచిపోయాయి. భారీ బండరాళ్లు జాతీయ రహదారి 144 పై పడటంతో భారీ వాహనాలు నిలిచిపోయాయి. రహదారిపై పడిన బండరాళ్లను తొలగించేందుకు బార్డర్ రోడ్ ఆర్గనైజేషన్ అధికారులు తీవ్రంగా శ్రమిస్తున్నారు.

ఉత్తరప్రదేశ్ లోని కాన్పూర్లో ఉరుములు, ఈదురుగాలులతో భారీ వర్షం పడింది. డ్రైనేజీలు పొంగిపోయి రోడ్లపై మోకాలి లోతు నీరు చేరడంతో వాహనదారులు ఇబ్బందులు పడ్డారు. హిమాచల్ ప్రదేశ్ లోని మండీ జిల్లాలో వర్షం కారణంగా టూరిస్టు వాహనాల రాకతో తీవ్ర ట్రాఫిక్ జాం ఏర్పడింది. కిలోమీటర్ల మేర వాహనాలు నిలిచిపోయాయి, ట్రాఫిక్ క్లియర్ చేసేందుకు పోలీసులు చర్యలు చేపట్టారు.

భారత వాతావరణ శాఖ (ఐఎండీ) హిమాచల్ ప్రదేశ్, ఉత్తరాఖండ్, పంజాబ్, హర్యాణ, జమ్మూ కాశ్మీర్లకు యెల్లో అలర్ట్ జారీ చేసింది. గంటకు 60-70 కిలోమీటర్ల వేగంతో ఈదురుగాలులు వీచే అవకాశం ఉందని, రాజస్థాన్లో బలమైన గాలులు వీస్తాయని తెలిపింది. రాబోయే రెండు రోజులు వాయువ్య భారతంలో తేలికపాటి నుండి మోస్తరు వర్షాలు కొనసాగుతాయని, కానీ నిన్నటితో పోలిస్తే తీవ్రత తగ్గుతుందని అధికారులు వివరించారు.