ఉత్తరాంధ్ర, కోనసీమ జిల్లాల్లో భారీ వర్షాలు; రోడ్లు జలమయం

ఉత్తరాంధ్ర, కోనసీమ జిల్లాలతో పాటు కృష్ణా జిల్లాలోని పలు ప్రాంతాల్లో ఈదురుగాలులతో కూడిన భారీ వర్షం కురుస్తోంది. రాజమండ్రి, మచిలీపట్నం, పామర్రు తదితర ప్రాంతాల్లో రోడ్లపై నీరు నిలిచింది. దీంతో రాకపోకలకు అంతరాయం ఏర్పడింది.

రాజమండ్రిలో తెల్లవారుజాము నుంచి ఎడతెరిపి లేకుండా వర్షం పడుతోంది. ప్రధాన రహదారులు, లోతట్టు ప్రాంతాలు నీట మునిగాయి. మచిలీపట్నంలో మోకాలి లోతు నీరు చేరగా, ఆర్టీసీ బస్ స్టాండ్ పూర్తిగా నీటిలో చిక్కుకుంది.

కృష్ణా జిల్లా పామర్రులో తహసీల్దార్ కార్యాలయం లోపలికి వర్షపు నీరు వచ్చింది. మున్సిపల్ సిబ్బంది నీటిని తొలగించే చర్యల్లో నిమగ్నమయ్యారు. వర్షం రాకతో రైతులు సంతోషం వ్యక్తం చేశారు. ఈ వర్షం పంటల సాగుకు ఎంతో ఉపయోగపడుతుందని వారు భావిస్తున్నారు.