తిరుమలలో భారీ రద్దీ: 24 గంటల వరకు పెరిగిన దర్శన సమయం, భక్తుల అసౌకర్యం

తిరుమల శ్రీవేంకటేశ్వరస్వామి ఆలయంలో భారీ సంఖ్యలో భక్తులు రావడంతో దర్శనానికి 24 గంటల వరకు సమయం పడుతోంది. క్యూ లైన్లు పొడిగించడంతో నడవాల్సిన దూరం పెరిగిందని భక్తులు చెబుతున్నారు.

గద్వాల జిల్లాకు చెందిన రామకృష్ణ అనే భక్తుడు మాట్లాడుతూ, దర్శనం పూర్తి కావడానికి కనీసం 24 గంటలు పట్టిందన్నారు. చిన్న పిల్లలు, వృద్ధులతో వచ్చిన వారికి నడవడం కష్టంగా ఉందని, రాత్రి సమయంలో ఒక అబ్బాయి క్యూ లైన్లో పడిపోయాడని తెలిపారు.

మరికొందరు భక్తులు నీళ్లు సరిగా అందించడం లేదని, పోలీసులు సహకరించడం లేదని అసంతృప్తి వ్యక్తం చేశారు. హైదరాబాద్ నుంచి వచ్చిన అజయ్ అనే భక్తుడు, లైన్లను ఎక్కడెక్కడ నుంచో కలిపారని, దీనివల్ల నడిచే దూరం బాగా పెరిగిందని చెప్పారు.

బాపట్లకు చెందిన మరో భక్తుడు దర్శనానికి 20 గంటల సమయం పట్టిందని, ఊరంతా తిప్పించడంతో ఇబ్బంది పడ్డామని తెలిపారు. అయితే, స్వామి దర్శనం అయిన తర్వాత కష్టమంతా మర్చిపోయామని భక్తులు పేర్కొంటున్నారు.

ప్రస్తుతం తిరుమలలో భారీగా భక్తులు ఉన్న నేపథ్యంలో TTD సౌకర్యాలపై భక్తుల నుంచి మిశ్రమ స్పందన వ్యక్తమవుతోంది. పరిస్థితిపై TTD అధికారుల స్పందన తెలియాల్సి ఉంది.