హైకోర్టు మహిళా కోర్టు ఉద్యోగుల సెలవులపై దాఖలైన పిల్ కొట్టివేసింది

రాష్ట్ర హైకోర్టు జిల్లా న్యాయవ్యవస్థలో పనిచేస్తున్న మహిళా ఉద్యోగులకు 180 రోజుల శిశు సంరక్షణ సెలవులు, 5 అదనపు సాధారణ సెలవులు మంజూరు చేయాలని కోరుతూ దాఖలైన ప్రజా ప్రయోజన వ్యాజ్యాన్ని (పిల్) హైకోర్టు కొట్టివేసింది. సర్వీస్ సంబంధిత విషయాలపై పిల్ దాఖలు చేయడానికి వీల్లేదన్న సుప్రీంకోర్టు తీర్పును ఉటంకిస్తూ ధర్మాసనం ఈ నిర్ణయం తీసుకుంది.

డాక్టర్ అశోక్ బాబు అనే వ్యక్తి ఈ పిల్‌ను దాఖలు చేశారు. ప్రభుత్వ శాఖల మహిళా ఉద్యోగులకు లభించే శిశు సంరక్షణ సెలవులను కోర్టు ఉద్యోగులకు కూడా వర్తింపజేయాలని ఆయన తరపు న్యాయవాది సాల్మన్ రాజు వాదించారు.

విచారణ సందర్భంగా హైకోర్టు స్టాండింగ్ కౌన్సిల్ వివేకానంద, సుప్రీంకోర్టు ఇప్పటికే సర్వీస్ అంశాలపై పిల్ ను అనుమతించడం లేదని తెలిపారు. హైకోర్టు ప్రధాన న్యాయమూర్తి జస్టిస్ లిసాగిల్, జస్టిస్ ఆర్ రఘునందన్ రావులతో కూడిన ధర్మాసనం ఇరు పక్షాల వాదనలు విని, పిల్ విచారణకు అర్హత లేదని స్పష్టం చేస్తూ దానిని తోసిపుచ్చింది.