HMDA మేడిపల్లిలో 63 ప్లాట్ల వేలంతో ₹120 కోట్ల ఆదాయం

హైదరాబాద్‌లోని మేడిపల్లి లేఅవుట్‌లో హైదరాబాద్ మెట్రోపాలిటన్ డెవలప్‌మెంట్ అథారిటీ (HMDA) నిర్వహించిన ప్లాట్ల వేలంలో ₹120 కోట్ల ఆదాయం వచ్చింది. ఈ వేలంలో 68 ప్లాట్లను అమ్మకానికి పెట్టగా, వివిధ కారణాలతో ఐదు ప్లాట్లకు వేలం జరగలేదు. మిగిలిన 63 ప్లాట్లను వేలం వేశారు.

ఈ ప్లాట్ల కనీస ధరను చదరపు గజానికి ₹45,000గా అధికారులు నిర్ణయించారు. వేలంలో అత్యధికంగా చదరపు గజానికి ₹80,000 ధర పలికింది. సగటున చదరపు గజానికి ₹56,260 లభించినట్టు అధికారులు తెలిపారు. ఈ ధర ఆ ప్రాంతంలో ఇప్పటివరకు నమోదైన అత్యధికమని HMDA అధికారులు పేర్కొన్నారు.

HMDA ప్లాట్లకు స్పష్టమైన టైటిళ్లు, వివాదాలు లేని భూములు అనే పేరుండటంతో ప్రజల్లో నమ్మకం ఎక్కువ. దీంతో ఈ వేలంలో పోటీ పడే వారి సంఖ్య ఎక్కువగానే ఉందని అధికారులు వివరించారు. ఈ ప్లాట్ల విస్తీర్ణం 231.66 చదరపు గజాల నుంచి 643.22 చదరపు గజాల వరకు ఉన్నట్లు తెలిపారు.

ఈ వేలం ద్వారా హైదరాబాద్‌లో రియల్ ఎస్టేట్‌కు డిమాండ్ ఉన్నట్లు సూచించిందని, భూములకు మంచి ధర లభించడం రియల్ ఎస్టేట్ రంగం వృద్ధికి సంకేతమని అధికారులు అభిప్రాయపడ్డారు.