బేగంపేట్లో అక్రమ అండ సేకరణ రాకెట్: 10 మంది యువతులు అదుపులో

హైదరాబాద్ బేగంపేటలోని ఓ గర్ల్స్ హాస్టల్లో అక్రమంగా అండాలు సేకరించి అమ్మే రాకెట్ జరుగుతున్నట్టు పోలీసుల ప్రాథమిక విచారణలో తేలింది. ప్రకాష్ నగర్‌లోని అమినిత గర్ల్స్ హాస్టల్‌పై పోలీసులు అర్ధరాత్రి దాడులు చేశారు.

ఇతర రాష్ట్రాల నుంచి యువతులను ఇక్కడికి తీసుకొచ్చి, వారి అండాలు సేకరించి ఫెర్టిలిటీ సెంటర్లకు అమ్ముతున్నట్టు విచారణలో వెల్లడైంది. కొంతమంది పురుషుల నుంచి వీర్యం కూడా సేకరిస్తున్నట్టు పోలీసులు అనుమానిస్తున్నారు.

ఈ అక్రమ లావాదేవీ దాదాపు ఏడాది నుంచి కొనసాగుతున్నట్టు సమాచారం ఉంది. బిహార్, ఉత్తరప్రదేశ్, ఒడిశా రాష్ట్రాలకు చెందిన 10 మంది యువతులను విచారణ కోసం అదుపులోకి తీసుకున్నారు.

ఈ ఆపరేషన్ వెనుక ఎవరు ఉన్నారు, ఏ ఫెర్టిలిటీ సెంటర్లకు అండాలు సరఫరా అయ్యాయి అనే అంశాలపై పోలీసులు దర్యాప్తు కొనసాగిస్తున్నారు.