లాల్ దర్వాజా బోనాల వేడుకల నేపథ్యంలో హైదరాబాద్‌లో ట్రాఫిక్ డైవర్షన్లు, 12 పార్కింగ్ ప్రదేశాలు

లాల్ దర్వాజా సింహవాహిని మహంకాళి అమ్మవారి ఆలయంలో బోనాల వేడుకల సందర్భంగా హైదరాబాద్ ట్రాఫిక్ పోలీసులు విస్తృత ఏర్పాట్లు చేశారు. మొత్తం 450 మంది ట్రాఫిక్ సిబ్బందిని మోహరించారు. 28 ప్రదేశాల్లో డైవర్షన్లు అమలు చేస్తున్నారు.

భక్తుల కోసం 12 ప్రత్యేక పార్కింగ్ ప్రదేశాలు గుర్తించామని ట్రాఫిక్ డీసీపీ రాహుల్ హెగ్డే తెలిపారు. లాల్ దర్వాజా ఆలయానికి 500 మీటర్ల దూరంలోనే పార్కింగ్ సౌకర్యం అందుబాటులో ఉంటుంది. ట్రాఫిక్ డైవర్షన్లకు సంబంధించి సైన్ బోర్డులు, బారికేడ్లు ఏర్పాటు చేశారు.

నాగుల చింత టీ జంక్షన్, ఓపీ చత్రినాక, గౌలిపుర, బేలా, ఉప్పుగూడ టీ జంక్షన్, చంద్రాయణగుట్ట, షంషీర్ గంజ్, ఇంజిన్ బౌలి, ఓల్గా జంక్షన్, మూసా బౌలి తదితర ప్రాంతాల్లో భారీ వాహనాలు, నాలుగు చక్రాల వాహనాలు, ఆర్టీసీ బస్సులకు డైవర్షన్లు అమలు చేస్తున్నారు. కొన్ని చోట్ల పూర్తిగా రోడ్లు మూసివేశారు.

రేపటి అంబారి, పలహారం బండి ఊరేగింపుల సందర్భంగా డైనమిక్ డైవర్షన్లు ప్లాన్ చేసినట్లు డీసీపీ వివరించారు. ఊరేగింపు ముందుకు సాగే క్రమంలో డైవర్షన్లు ప్రారంభమై, దాటిపోగానే తెరుస్తారు. ఈ ప్రాంతంలోని మొత్తం 26 ఆలయాల చిన్న చిన్న ఊరేగింపులకు సమన్వయం చేస్తున్నారు.

భక్తులు ట్రాఫిక్ సూచనలు పాటించాలని, వాహనాలు రోడ్డు మీద పార్కింగ్ చేయకుండా నిర్దేశించిన పార్కింగ్ స్థలాల్లో ఉంచాలని అధికారులు విజ్ఞప్తి చేశారు. ప్రశాంత వాతావరణంలో అమ్మవారిని దర్శించుకోవచ్చని తెలిపారు.