చేపల ఫీడ్‌గా చికెన్ వేస్టేజ్: హైదరాబాద్‌లో 7 లారీలు సీజ్

హైదరాబాద్‌లో చికెన్ వేస్టేజ్‌ను ఏడు లారీల్లో ఆంధ్రప్రదేశ్‌కు తరలిస్తుండగా అధికారులు స్వాధీనం చేసుకున్నారు. చికెన్ సెంటర్ల నుంచి సేకరించిన ఈకలు, పేగులు, తోలు వంటి వ్యర్థాలను గోదాముల్లో నిల్వ చేసి చేపల చెరువులకు సరఫరా చేస్తున్నట్లు తెలిసింది.

రోజూ 2-3 క్వింటాళ్ల కోళ్లు కోయడం వల్ల 60-70 కిలోల వ్యర్థాలు ఉత్పత్తి అవుతాయి. గతంలో ఈ వ్యర్థాలను రెండరింగ్ ప్లాంట్లకు పంపించగా, ఇప్పుడు ప్రైవేటు వ్యక్తులు చేపల ఫీడ్ కోసం తరలిస్తున్నారు. తెలంగాణలోని కొన్ని ప్రాంతాల నుంచి కూడా ఇలాంటి సరఫరా జరుగుతోంది.

నిల్వ ఉంచిన వ్యర్థాలు మురిగిపోయి, ఈగలు, పురుగులు వ్యాపించే ప్రమాదం ఉంది. ఇలాంటి చెడిపోయిన వ్యర్థాలను చేపలు తింటే, వాటిని తినే మనుషులకు క్యాన్సర్ వంటి వ్యాధులు వచ్చే అవకాశం ఉందని ఆరోగ్య నిపుణులు హెచ్చరిస్తున్నారు.

ఈ దందా కొనసాగుతుండటంతో ఆహార భద్రతపై ఆందోళన వ్యక్తమవుతోంది. చికెన్ వ్యర్థాలను చేపలకు వేసేవారిపై కఠిన చర్యలు తీసుకోవాలని ప్రజలు డిమాండ్ చేస్తున్నారు.