హైదరాబాద్ క్యూర్ 2026 బిల్లుపై వివాదం: ప్రాపర్టీ టాక్స్, అధికార కేంద్రీకరణపై అభ్యంతరాలు

తెలంగాణ ప్రభుత్వం హైదరాబాద్, సైబరాబాద్, సికింద్రాబాద్ ప్రాంతాల అభివృద్ధికి ఒకే పాలన విధానం తీసుకురావడానికి క్యూర్ 2026 బిల్లును ప్రతిపాదించింది. అయితే ఈ బిల్లుపై నగరవాసులు, రెసిడెన్షియల్ వెల్ఫేర్ అసోసియేషన్లు, పట్టణాభివృద్ధి నిపుణులు తీవ్ర అభ్యంతరాలు వ్యక్తం చేస్తున్నారు.

ప్రధాన అభ్యంతరం ప్రాపర్టీ టాక్స్ విధానంపైనే. మార్కెట్ విలువ, వినియోగం, ప్రాంతాల అభివృద్ధి వంటి అంశాల ఆధారంగా పన్ను లెక్కించడం వల్ల సామాన్య, మధ్య తరగతి కుటుంబాలపై అదనపు భారం పడుతుందని నగరవాసులు ఆందోళన వ్యక్తం చేస్తున్నారు. ఇప్పటికే విద్యుత్, నీటి చార్జీలు, నిర్వహణ ఖర్చులు పెరిగిన పరిస్థితుల్లో మరో భారం కానుందని వారు చెబుతున్నారు.

బిల్లులో పలు అధికారాలు ఎపెక్స్ కౌన్సిల్‌కు కేంద్రీకృతం కావడం, వార్డు స్థాయి ప్రజా ప్రతినిధుల పాత్ర తగ్గిపోవడం కూడా విమర్శలకు దారితీసింది. నగర ప్రణాళిక, నిధుల కేటాయింపు, ప్రధాన ప్రాజెక్టుల ఆమోదం వంటి కీలక అధికారాలు ఒకే సంస్థ చేతుల్లో ఉండటం ప్రజాస్వామ్య వికేంద్రీకరణకు విరుద్ధమని నిపుణులు అంటున్నారు. 74వ రాజ్యాంగ సవరణ ప్రకారం మున్సిపల్ కార్పొరేషన్లు ఎన్నికైన వార్డు కమిటీలు, మేయర్ల ద్వారా నడపాలని, కానీ ఈ బిల్లు అందుకు విరుద్ధంగా ఉందని వారు పేర్కొంటున్నారు.

అలాగే, అక్రమ నిర్మాణాలకు పరోక్షంగా చట్టబద్ధత కల్పించే అవకాశం ఉందని కొందరు ఆరోపిస్తున్నారు. నిబంధనలు ఉల్లంఘించి కట్టిన భవనాలకు క్రమబద్ధీకరణ జరిగితే, నియమ నిబంధనలు పాటించిన వారికి అన్యాయం జరుగుతుందని వారు ఆందోళన వ్యక్తం చేస్తున్నారు.

ఇప్పటికే మొత్తం 3,800 అభ్యంతరాలు రెసిడెన్షియల్ వెల్ఫేర్ అసోసియేషన్లు, పౌర సంఘాలు, నిపుణుల నుంచి ఆన్‌లైన్‌లో ప్రభుత్వానికి వచ్చాయి. ప్రజాభిప్రాయ సేకరణ చేపట్టాలని డిమాండ్లు వినిపిస్తున్నాయి. ప్రభుత్వం మాత్రం ఈ బిల్లు నగర భవిష్యత్తుకు అవసరమైన సంస్కరణ అని పేర్కొంటోంది. ఈ సూచనలను పరిగణనలోకి తీసుకుని సవరణలు చేస్తుందా లేదా అనేది వేచి చూడాలి.