హైదరాబాద్‌లో టపాసుల దుకాణాలకు కఠిన భద్రతా నిబంధనలు: ఫైర్ అధికారి వెంకన్న

దీపావళి సీజన్‌లో హైదరాబాద్‌లో టపాసుల దుకాణాలు ఏర్పాటు చేసే విక్రేతలు అగ్నిమాపక శాఖ నిబంధనలు తప్పనిసరిగా పాటించాలని జిల్లా అగ్నిమాపక అధికారి తగరం వెంకన్న తెలిపారు. భద్రతా ప్రమాణాలు పాటిస్తేనే దుకాణాలకు అనుమతులు ఇస్తామని ఆయన చెప్పారు.

దుకాణాల ఏర్పాటుపై ఆయన మాట్లాడుతూ, శాఖ ఎంపిక చేసిన ఖాళీ ప్రదేశాల్లోనే తాత్కాలిక లైసెన్స్ ఇస్తామని తెలిపారు. తగలని పదార్థాలతో (non-flammable) టిన్ షెడ్లు వేయాలి. ఒక దుకాణానికి మరో దుకాణానికి మధ్య మూడు మీటర్ల దూరం ఉండాలి. ఒక క్లస్టర్‌లో 100కు మించి దుకాణాలకు అనుమతి ఇవ్వరు.

లైసెన్స్‌లో పేర్కొన్న మోతాదులోనే టపాసులు నిల్వ ఉంచాలి. బయట తయారు చేసిన చట్టవిరుద్ధ టపాసులను వాటిలో కలపకూడదు. 200 లీటర్ల నీటి బ్యారెల్ తప్పనిసరిగా ఉంచాలి. రెండు డ్రై శాండ్ బకెట్లు ఉంచుకుంటే ఉపయోగకరంగా ఉంటుందని ఆయన సూచించారు. హిందీ, ఇంగ్లీష్, తెలుగులో 'నో స్మోకింగ్' బోర్డులు పెట్టాలి. పెద్దవాళ్లే విక్రయం చేయాలి.

కొనుగోలుదారులకు టపాసులు బాగా పేలుతాయని చెప్పి డెమో చేయకూడదు. కొనుగోలుకు వచ్చే వాహనాలను 15 మీటర్ల దూరంలో ఉంచాలి. విజిలెన్స్ తప్పనిసరి. అమ్మిన తర్వాత ఖాళీ కార్టన్లను వెంటనే తొలగించాలి.

లైసెన్స్ కోసం శాఖ వెబ్‌సైట్‌లో సిటిజన్ లాగిన్ ద్వారా ఆన్‌లైన్‌లో దరఖాస్తు చేయాలి. ₹500 ఫీజు చెల్లిస్తే దరఖాస్తు నేరుగా సంబంధిత ఫైర్ స్టేషన్ అధికారికి వెళ్తుంది. అధికారి స్థలాన్ని పరిశీలించి సిఫారసు చేస్తారు.

అనుమతి లేకుండా టపాసులు అమ్మితే విజిలెన్స్, పోలీసు శాఖలు చర్యలు తీసుకుంటాయని వెంకన్న తెలిపారు. ఫిర్యాదు వచ్చినప్పుడు పోలీసు, రెవెన్యూ శాఖలతో సమన్వయం చేసి చర్యలు తీసుకుంటామని ఆయన చెప్పారు. వ్యాపారంతో పాటు ప్రాణాలు, ఆస్తుల భద్రత కూడా ముఖ్యమని ఆయన పేర్కొన్నారు.